Fare for flaum på Sørlandet - ber folk førebu seg

Mykje nedbør og snøsmelting kan føre til lokal flaum og overvatn fleire stader langs kysten av Sørlandet i dag.

Det melder Noregs vassdrags- og energidirektorat som har sendt ut varsel på gult nivå.

Folk må førebu seg

Folk blir anbefalt å reinse stikkrenner, kummar og andre vassvegar slik at vatnet kan renne uhindra forbi.

– Det er flaumvarsel på gult nivå. Det er fordi det vil komme ein god del nedbør over fleire dagar, i tillegg til at det ligg ein god del snø fleire stader som vil smelte.

Det seier hydrolog Elin Langsholt ved Noregs vassdrags- og energidirektorat (NVE)

– Bør folk foreta seg noko?

– Dersom ein har sjanse til å reinske opp litt i dreneringsløp og der vatnet skal renne så er det bra, seier Langsholt.

Mykje regn

– Det blir nokre våte døgn framover både i dag og i morgon, seier statsmeteorolog Siri Wiberg.

Mest nedbør er det venta i ytre, sørlege strok.

– Nedbøren kjem som snø i fjellet over 500–700 meter, men der blir det ikkje dei store mengdene, seier Wiberg.

Ein god del vind

I tillegg til mykje nedbør fram mot helga bles det også godt langs kysten.

– Vinden kjem opp i frisk bris til liten kuling og i morgon vil den ta seg opp i austlege område, seier Wiberg.