– Det har blitt vanskelegare å skaffe frivillige, seier avtroppande leiar i 17. mai-komiteen i Flekkefjord, Glenn Tønnessen.
Det er lite som minner om «mai du skjøne milde» ute i snøfonnene i Flekkefjord no, men dei som brenn for feiringa er at i gang med å planleggje.
Og, dei er uroa.
Treng dugnadstimar
– I fjor klarte dei med eit naudskrik å arrangere nasjonaldagen i byen. Men, då måtte kommunen nesten be på knea sine, minnest Tønnessen.
Ifølgje han blir det opplevd som om innstillinga til å jobbe dugnad endra seg etter pandemien. Det kan vere dugnadar som å stå i kiosk, lage leikeaktivitetar for barna eller andre aktivitetar det trengst hjelp til.
I følgje avisa Agder treng dei 800 dugnadstimar.
Kjell Ståle Hamar er styreleiar i Flekkefjord handballklubb som bidrog til dugnaden saman med andre lag i fjor.
Glenn Tønnessen og Kjell Ståle Hamar hadde begge hendene fulle under 17. mai-feiringa i Flekkefjord i fjor.
Foto: Lars Eie / NRK– I fjor var det jo litt spennande om vi greidde å få det til. Vi la ned mellom åtti og hundre dugnadstimar, og vi har ikkje all verda med medlemmar heller, seier Hamar.
Satsar på nytt lag
I neste bystyre skal det veljast ein ny 17. mai-komité for den komande fireårsperioden.
Tønnessen er sjølv bystyrepolitikar og har leia denne komiteen i fire år.
– Vi treng nokon som kan brette opp ermane og skape den fantastiske feiringa vi har i Flekkefjord, seier Tønnessen.
– Ropar du ein varsku no?
– Ja, eg gjer det, for det var veldig vanskeleg å kome i mål i fjor, og vi må klare å lage ei fullskala feiring igjen, seier han.
– Ikkje berre spør dei same
Generalsekretær i organisasjonen Frivillighet Norge, Stian Slotterøy Johnsen, har tips til korleis ein kan få fleire med på dugnad.
– Den viktigaste årsaka til at folk ikkje gjer frivillig innsats er at dei ikkje har blitt spurde. Eg tenkjer det viktigaste vi kan gjere er å vere flinke til å spørje folk om dei vil bidra og å spørje nye folk, ikkje berre dei som har vore med tidlegare, seier han.
Stian Slotterøy Johnsen meiner dugnad gir mykje tilbake til dei som står på.
Foto: Ronja Schrøder / NRKSlotterøy Johnsen meiner at det å skape eit stort arrangement i nærmiljøet gir mykje tilbake til dei som stiller opp.
– Eg kjenner ikkje til fleire døme på fleire som slit med å få til dugnad på 17.-mai. Vi veit at det var ein nedgang i den frivillige innsatsen under pandemien. No viser fleire undersøkingar at innsatsen har auka igjen og er tilbake på nivået den var før 2020. Frivillegheita og dugnadsånda lever framleis, meiner han.
