– Eg klarer ikkje å setje ord på kor herleg det er å vere tilbake. Det har vore ein sjukt lang periode med kjedeleg opptrening, seier strekspelaren til NRK.
Det var i desember i fjor at islendingen pådrog seg ein alvorleg skade i skuldra. Åtte månader seinare er han endeleg skadefri.
Tøff bortekamp
Førre helg gjorde han comeback då han fekk speletid i cupsigeren borte mot Nærbø.
Denne helga er han med i kamptroppen som skal møte Halden på bortebane i 2. serierunde i eliteserien.
– Det er ein av dei vanskelegaste bortekampane i løpet av sesongen. Dei har eit sinnssjukt bra lag som vi må ta seriøst. Dei kjem til å køyre på og vi må vere til stades frå første minutt, seier Hrafnsson.
Skulderskaden gjorde at islendingen gjekk glipp av både serie- og cupgull i fjor. Han fekk medalje i begge turneringar, men fekk ikkje spele dei viktige og avgjerande kampane.
Einar Ingi Hranfsson deltok på cupfesten då laget vann cupfinalen i desember i fjor. Du ser Hrafnsson så vidt bakarst til venstre i bilete.
Foto: Sander Heggheim/NRKHåpar på nye gull
– Det var sjølvsagt gøy å sjå at laget gjorde det godt. Men samstundes var det tungt å sitte på tribunen, seier han.
– Når er du tilbake i toppform?
– Det er vanskeleg å seie. Det vil nok ta litt tid. Eg må vere litt forsiktig og ikkje haste meg tilbake, seier han.
No håpar han på at laget kan kopiere fjorårets suksess denne sesongen.
– Eg håpar vi kan kjempe om gull i alle turneringar vi er med i. Det meiner eg vi er gode nok til, seier han.
Arendalittane vann første serierunde mot Stord.
