NRK Meny
Normal

Ba politiet komme for å fjerne Pokémon

Ein kvinne i Mandal ringde politiet for å få dei til å fjerne «irriterande» Pokémon utanfor bustaden hennar. Pokémon har nærast blitt daglegdags for politiet.

Pokemon Go

Etter lanseringa av Pokémon Go har politiet over heile landet fått telefonar frå folk.

Foto: TORU HANAI / Reuters

– Ho var lei av både biltrafikk og folk som stod og skravla på utsida, seier operasjonsleiar i Agder-politiet, Per Kristian Klausen.

Per Kristian Klausen

Per Kristian Klausen er operasjonsleiar i Agder-politiet.

Foto: Lars Eie / NRK

Men tilbakemeldinga frå politiet var klinkande klar, då kvinna ringde og ba politiet om å fjerne pokémon i området, slik at folk heldt seg vekke.

– Vi rykker ikkje ut for å ta Pokémon, ler Klausen.

Politiet skreiv følgjande på Twitter: «Vet ikke hvordan eller hvor vi skal gjøre av den. Ingen utrykning».

Hagelusking og mopedar i full fart

Den siste tida har politiet fått ei rekkje telefonar frå folk som irriterer seg over pokémonspelarar over heile landet.

Saktekøyrande bilar, mopedar i full fart, folk som luskar i private hagar og barn som er ute midt på natta, er blant innhaldet i telefonsamtalane.

Andre stader i landet har faktisk politiet sett seg nøydde til å rykke ut.

I Førde i Sogn og Fjordane tok politiet affære då dei kom over tre gutar i sentrum midt på natta.

Politiet meinte det var feil tid på døgnet for slikt og køyrde dei heim til foreldra.

Vart bøtelagd

I Mo i Rana fekk politiet melding om mogleg innbrot på ein sjukeheim. Ved nærare undersøking viste det seg at det var nokre tenåringsgutar som klatra frå veranda til veranda for å fange Pokémon.

I Drammen oppstod ein meir alvorleg situasjon førre søndag. Ein bilførar på Pokémon-jakt gav blaffen i trafikkreglane og køyrde i ei einvegskøyrd gate.

Det er uklart om paret i bilen klarte å fange Pokémon. Det som iallefall er sikkert er at politiet klarte å fange Pokémon-jegarane. Dette kosta bilføraren 4200 kroner.

– Slik går det når det går over alle støvleskaft. Då må politiet gripe inn, sa operasjonsleiar Trond Egil Groth ved Drammen politistasjon til Drammens Tidende.

Politimann påkøyrd av Pokémon-spelar

Operasjonsleiaren i Agder-politiet har sjølv kjent Pokémon-jakta på kroppen.

– Eg stod og venta på grønt lys i gangfelt. Plutseleg vart eg påkøyrd av ei dame som kom bak meg i rullestol. Ho spelte Pokémon. Eg fekk ikkje sagt noko til ho, for ho forsvann så raskt, seier operasjonsleiar Per Kristian Klausen.

– Men eg prøvde å seie at ho måtte følgje med og vere merksam, seier Klausen som understrekar at han ikkje fekk vondt.

Operasjonsleiaren understrekar at pokémon normalt ikkje er politimat.

– Vi klarer i alle fall ikkje å fjerne Pokémon, seier han.