– Rock'n roll fiskeboll

– Rock'n roll fiskeboll, dududududu, syng 5 år gamle Torjus Oksefjell i Sentrum barnehage i Kvinesdal.

– Kva veit du om rockefestivalar?

– Det er noko vi feirar, seier han.

Tvillingbroren Arne Oksefjell såg fram til å rockefestival i barnehagen sin.

– Vi skal rock'n roll og så skal vi bade i badebasseng, seier han før Per Tore Bjerge frå Luxus Leverpostei sette i gang med gitar og sang i barnehagen.

Eigen camp

For rockefestivalen fekk storfint besøk frå festivalgeneral i Norway Rock, Kelly Aamodt og nemde Per Tore Bjerge frå Luxus Leverpostei.

– Vi hadde eigentleg ikkje tid, men vi tek oss tid. Vi fekk ein førspurnad om vi kunne underhalde litt slik at barna fekk ein smakebit av rockefestival. Då sa vi at vi eigentleg ikkje hadde tid, men vi skal lage tid, seier Bjerge.

Barnehagen hadde laga både festivalcamp, festivalband, VIP-område og scene i forkant. I tillegg hadde dei sminka kvarandre og laga gitarar i papp. Aamodt og Bjerge hadde med seg ei overrasking til barna. Alle fekk kvar sin kopp og caps frå arrangøren av Norway Rock.

• LES OGSÅ: Fleire politifolk på Norway Rock

– Dette er framtidas rockarar. Det er kjekt å bli spurt. Vi må ta oss tid til å stille opp på slikt. Dei har band, dei vart akkrediterte på veg inn i barnehagen på morgonen. Dei har VIP-tribune og dei har campingplass. Du ser at det er engasjement her. Så det er gøy, seier Aamodt.

– Musikk, glede og samhald

Styrar i Sentrum barnehage, Bente Ingebretsen, fortel om godt engasjement blant barna i barnehagen.

• LES OGSÅ: Ble presset til Hells Angels-nekt

– Det handlar om musikk, glede og samhald. Det er verdiar som vi står for i ein barnehage. Det er klart at vi må gjere det same som dei gjer på Norway Rock, seier ho.

– Trur du det er framtidige rockarar eller rockearrangørar her?

– Det trur eg. Grunnen er at vi i Kvinesdal står saman. Det er klart at når du får denne følelsen av å gjere ting saman når dei er små, så trur eg noko står på sletta og riggar scene om nokre år, seier Ingebretsen. medan barna syng Kaptein Sabeltann-songar.