– Tjostolv: Livet ditt vart kort, men unikt. Eg saknar deg og ditt venskap veldig mykje. Eg kjem aldri til å gløyme deg, men vil ha deg med meg resten av mitt liv, skriv French i si siste helsing til Moland.
Torsdag vart Tjostolv Moland gravlagd i heimbygda Vegårshei. Mange hadde møtt opp for å ta farvel med Moland. Men bestekameraten Joshua fekk ikkje komme til Norge for å vere med i begravelsen, då han framleis sit fengsla i Kongo.
– Du er ein unik person
– I dag skulle eg gjerne ha vore i Norge og vist deg den respekten eg har for deg, skriv French.
– Du er ein unik person. For meg som kjente deg så godt blir det vanskeleg å vite kor eg skal byrje når eg skal beskrive deg for andre slik eg kjende deg, skreiv kameraten Joshua French i minneordet til Tjostolv Moland.
Kring 400 menneske møtte opp for å ta farvel med Moland. Nær familie, vener, og offisielle representantar frå Vegårshei kommune var med i begravelsen.
Tjostolv Moland vart berre 32 år gammal.
Funnen død på cella
Tjostolv Moland sat fengsla i Kongo i over fire år då han vart funnen død på cella 18. august i år.
Moland og French vart i 2010 dømde til døden for mellom anna drap og spionasje.
Norge forsøkte lenge å få dei to nordmennene utlevert frå Kongo utan å lukkast. Joshua French sit framleis i fengsel.
– Alle som var så heldige å få lov til å kalle seg din ven, fekk ein ven av klasse, skriv French om kameraten.
– Dine mange gode eigenskapar og gode personlegheitstrekk let seg vanskeleg beskrive i desse få orda, men eg håpar ein dag å kunne gje deg eit større beskrivande rom for våre år saman, skriv French.