Larsen hadde kveldsvakt på jobb og hadde ikkje lagt seg då det tok til å brenne.
Ho vart først gjort merksam på at det brann då ein nabo hamra på døra og ropte at det brann. Dottera hennar ringde brannvesenet.
– Eg sprang ut og såg at huset var fullstendig overtent. Så sjekka vi at naboane i dei andre leilegheitene hadde komme seg ut, fortel Larsen.
Se video frå brannen.
11 var evakuert
Ho fortel om hektiske og dramatiske minutt på Nedre Slettheia i bydelen Vågsbygd.
– Ein annan nabo forsøkte å sløkke brannen med eit brannsløkkingsapparat. Seinare samlast vi, eg henta litt teppe og vi fekk komme inn til ein nabo lengre borte. Der var vi til i tretida i natt, medan dei andre som budde i rekkehuset vart evakuert til Hotell Norge, seier Larsen.
11 personar budde i rekkehuset som brann, og ingen vart skada.
I leilegheita som tok fyr budde det ingen. Huset som har ligge ute for sal ei lita stund er totalskadd.
– Den eine leilegheita er totalt utbrent. I tillegg oppstod det innbrenning i naboleilegheita. Då må ein også rekne med at det er store brann- og røykskadar i dei to andre bustadene, seier operasjonsleiar i Agder-politiet Martin Ugland.
Veit ikkje kvifor det brann
Brannen har gjort inntrykk på naboane, seier Larsen.
– Det er ikkje greitt. Det er skummelt med brann, men det var godt med politifolk, så vi følte oss trygge og godt varetekne, seier ho.
– Det er uhyggeleg og eg er veldig glad det ikkje budde folk i huset, seier Larsen.
Brannårsaka er førebels ikkje kjent.
Slik såg rekkehuset ut nokre timar etter brannen.
