Villmark-stjerna kom til premierefest i turhabitten

SOGNDAL (NRK): Dei to hovudrolleinnehavarane var begge til stades under premieren av Villmark 2 i Sogndal Kulturhus. Den eine litt betre kledd enn den andre.

Premiere for Villmark 2

FJONG STIL: Ellen Dorrit Petersen og Anders Baasmo Christiansen rett før dei hastar inn til premiereframsyninga av Villmark 2.

Foto: Line Omland Eilevstjønn / NRK

To minutt før filmen skulle starte kom ein raudkjaka Baasmo Christiansen springande i full turhabitt, søkkvåt og fornøgd. Antrekket stod betre til tittelen på filmen enn han eigentleg hadde planlagt.

For skodespelaren hadde nemleg teke seg ein aldri så liten fjelltur, kanskje for å roe nervene før premieren, og rakk ikkje å skifte.

– No gler eg meg!, var alt han rakk å seie før han forsvann inn i salen.

Saman med Ellen Dorrit Petersen spelar han hovudrolla i den nye norske storfilmen Villmark 2, ein film der store delar av handlinga utspelar seg på det nedlagde sanatoriet Harastølen i Luster.

For medskodespelaren er det første gong ho er med i ein skrekkfilm.

– Eg har berre tenkt at det handlar om å ta situasjonane og rolla mi på alvor, på same måte som i drama. Det er vanskeleg å førestille seg korleis du ville reagere viss du var i livsfare, men eg måtte berre prøve, seier ho.

Harastølen

SKREMMANDE: Ein rundtur på Harastølen, særleg i lett skumring, er ikkje for lettskremte.

Foto: Torben Stedje / NRK

Kulissane kunne uansett ikkje vore betre egna til å sette stemninga på settet. Harastølen vart bygt i 1902 og har sidan midten av nittitalet stått som eit spøkelseshus i fjellsida over fjorden, tomt og forlate.

– Der er det jo frykteleg skummelt og med ei historie som du ikkje blir kvitt. Det var det lett å tenkje på undervegs, seier ho.

Den offisielle premieredatoen er 9. oktober. I kveld er den andre gongen filmen blir vist på norske kinolerret, etter førpremieren på Stranda i Møre og Romsdal i går.

– Eg har skjønt det er nesten full sal, så eg er veldig spent på reaksjonane, seier Petersen før ho skundar seg inn i mørket.

Øya Bremangerlandet vil vere utan veg til fastlandet fram til neste veke.
For han som var sekundar frå å bli treft av steinblokkene, var det ei skremmande oppleving.
Over 3000 asylsøkjarar har forsvunne siste året.
  
Heile villreinstammen på Nordfjella, nær 2000 dyr, bør utryddast snarast råd. Det meiner forskarar etter at det i fjor blei påvist skrantesjuke. 
I dag møttes forskarar, politikararar og forvaltninga, for å diskutere den vidare kampen mot smitta.