No er Villmark 2 klar til framsyning

– Det kjennest veldig bra ut. Vi er veldig nøgde filmen og vi gler oss til å vise den fram til publikum, seier produsent Einar Loftesnes frå Sogndal.

Opptaka til «Villmark 2» starta i fjor sommar og delar av filmen er spelt inn på Harastølen i Luster og på Kaupanger i Sogndal. Filmen skal synast fram i kinosalar over heile landet frå 9. oktober, men nokre kan gle seg til å sjå filmen før alle andre.

Lovar ei skremmande oppleving

Urpremieren vil gå av stabelen under Fjellfilmfestivalen på Gjendesheim i Jotunheimen fredag. Deretter blir det framsyning i Stranda, der regissøren kjem frå, 2. oktober, og dagen etter blir det stor framsyning i Sogndal.

Produsenten gler seg til å syne den fram for eit breiare publikum. Han lovar folk ei skikkeleg skremmande oppleving.

– For å seie det slik så har eg sett den no nokre hundre gonger, men eg blir like riven med av dei siste 45 minuttane, så den er godt skremmande, særleg på slutten er det veldig intenst, seier Loftesnes.

• SJÅ KLIPP FRÅ FILMEN HER

Tette band mellom filmane

Og for dei som elska Villmark kan dei vente seg ein tett samanheng mellom den og oppfølgjaren.

– Du får oppklart litt av dei trådane som låg i slutten av filmen på Villmark. Mysteriet er det same, men vatnet ligg no bak Harastølen og det tek over Harastølen i løpet av filmen. Likevel står filmen på eiga hand og du treng ikkje ha sett første filmen, men det gir ein bonus å ha gjort det, fortel Loftesnes.

• LES OGSÅ: Første Villmark-glimt frå Harastølen
• LES OGSÅ: Vil lage skrekkfilm på Harastølen

Ein av dei største skilnadane mellom dei to filmane er kanskje teknologien som har utvikla seg stort sidan 2003.

– Vi likar å seie at vi har ei moderne utgåve av Villmark, så vi er mykje meir moderne både i filmspråket, teknikken, musikk, lyd og alt.

– Den neste norske storfilmen

Saman med resten av gjengen i produksjonsselskapet Handmade Films In Norwegian Woods starta Loftesnes med opptaka i fjor sommar, medan heile prosessen begynte i 2011. Han er spent på om dei vil nå eit publikum utover ungdommane.

– Vi håpar og trur at vi har laga ein film for dei unge, men samstundes ønskjer vi også at sekundærgruppa, altså dei som såg Villmark i 2003, skal gå inn i kinosalen. Vi har eigentleg laga den for ei breiare gruppe enn ved den første, seier han.

– Blir det haustens store kinofilm?

– Det er vanskeleg å seie i desse dagar når «Bølgen» går, men vi blir i alle fall årets norske grøssar og den neste norske storfilmen.