Vil ha gondolbane for turistar

Hopp til innhold

- Ei gondolbane hadde betydd mykje for reiselivet. Det vil kunne gjere oss sterkare som naturdestinasjon enn det vi er i dag, seier Synnøve Aabrekk i Reisemål Stryn og Nordfjord.

- Det hadde vore moro med ein gondol

Det har fleire gonger vore planar om gondolar i Sogn og Fjordane. Den gondolbana fylket hadde ligg i Luster, men har no rusta heilt ned.

I Sogn drøymer både Sogndal skisenter og leiaren i Bratt Moro om ei gondolbane.

- Fjella er tekne i bruk på ein heilt anna måte dei siste åra. Det hadde vore moro å hatt ein gondol, vi har truleg masse fjell å ta av, seier Tor Yttri i Bratt Moro til NRK.

LES OGSÅ: Ikkje gondolbane i Flåm
LES OGSÅ: Stryn kan få gondolbane

- Dette er noko for framtida

Og Aabrekk i Reisemål Stryn og Nordfjord er heilt med på den tanken.

- Utover Sognefjorden må det vere heilt fantastisk med ei gondolbane, seier Aabrekk.

I Alpane sel gondolturar som varmt kveitebrød til turistane. Dette kan ein få til også i Sogn og fjordane, og Aabrekk meiner både staten og fylkeskommunen bør vere med å finansiere ei gondolbane i fylket.

- Reiselivsnæringa er blant dei raskast veksande næringane i fylket. Dette er ei næring som Sogn og Fjordane kan bli avhengig av i framtida, difor må vi leggje til rette for den, seier Aabrekk.

LES OGSÅ: Nei til gondolbane på breen

(Artikkelen held fram under biletet)

Vil heller ha urørd natur

Men ikkje alle er like positive til ei gondolbane.

- Den urørde naturen er vårt fremste trekkplaster og har lokka folk hit i over hundre år. Eg meiner den urørde naturen framleis er det viktigaste vi har, seier Marino Ask, leiar i Sogn og Fjordane turlag.

Ask ser ikkje noko grunn til å gripe inn i naturen med å byggje gondolbaner i fjellsidene.

- Eg trur det fjordlandskapet vi har, som er heidra som både nasjonalparkar og landskapsvernområde, er det vi vil ha også i framtida, seier Ask til NRK.