Oppskorne bildekk, sjikanerande telefonoppringingar, grove truslar og vald. Det er berre ein del av prislappen norske lokalpolitikarar må betale for å vere med i kommunestyra.
Ei undersøking gjort av NRK viser at kvar femte toppkandidat har opplevd vald og sjikane.
Senterpartiet sin fylkesordførarkandidat i Sogn og Fjordane, Jenny Følling meiner anonyme debattar på nett har ein del av skulda.
– Eg meiner det er ei heilt klar kopling. For når folk slepp å skrive namnet sitt under eit innlegg kan folk tillate seg å skrive nesten kva som helst, seier Følling til NRK.no.
Så mange opplever truslar og sjikane
Mange lokalpolitikarar opplever at folk er langt frå nøgde for jobben dei gjer i kommunestyra. Vald og truslar er noko fleire har opplevd, mellom anna Framstegspartiet sin ordførarkandidat i Sandnes, Pål Morten Borgli.
Han opplevde at ein innbyggjar tok kvelartak på han.
– Eg var ute med familien og vart konfrontert av ein veljar som var frustrert over det offentlege systemet. Det var mykje aggresjon som førte til ein valdeleg situasjon og enda med at personen tok kvelartak på meg, seier Borgli som også har teke imot drapstruslar.
Og han er ikkje åleine. NRK har spurt 1916 listetoppar frå landets åtte største parti om dei har opplevd vald, truslar, hærverk eller sjikane i si tid som lokalpolitikarar. Kvar femte svarar ja.
- LES OGSÅ:
Vil anonyme nettdebattar til livs
Statistikken viser at dei som har vore lenger i kommunestyret er meir utsette for sjikane. Følling meiner det er på høg tid at ein tek eit oppgjer med anonym sjikane på internett fordi.
For dei mange personåtaka i nettdebattane kan føre til meir vald og truslar mot lokale folkevalde meiner fylkesordførarkandidaten.
– Dette er ein fare for demokratiet, seier Følling.
- LES OGSÅ:
- LES OGSÅ:
(Artikkelen held fram under biletet)
Vart kalla «hjernedød»
Høgrepolitikar i Florø, Hanne Husebø Kristensen, har sjølv blitt utsett for usakleg skitslenging på Internett.
– Det er veldig ofte generelle skildringar som at eg er dum, vondskapsfull, korrupt eller kunnskapslaus. Eg har også vore omtala som «hjernedød», seier Husebø Kristensen til NRK.no.
Lokalpolitikaren vil forby anonyme kommentarar i nettdebattar.
Vil ha meir aktive redaktørar i staden
Men generalsekretær i Norsk redaktørforeining, Nils Øy, er usamd.
Han seier anonyme innlegg ikkje er problemet, men at redaktørane er for passive.
– Generelt burde redaktørane vore langt flinkare til å både delta i debattane, men også til å redigere dei, seier Øy.