– Det fryser på mange stader og er stor fare for glatte vegar. Dette gjeld spesielt Hordaland, Sogn og Fjordane og Rogaland, seier trafikkoperatør ved Vegtrafikksentralen i Bergen, Marianne Hove.
Temperaturen er på veg ned, noko som kan gjere vegane såpeglatte. Hove har klare råd til alle som ferdast på mørke vintervegar onsdag kveld.
– Ta det med ro og tilpass farten etter forholda på vegen. Hugs at du bør ha god avstand til bilen som ligg framfor deg, seier ho.
På få timar har det vore fleire ulukker i vest. Sør for Hafslo på fv. 55 frontkolliderte to biler på ettermiddagen. Alarmsentralen i Sogn og Fjordane kunne melde om at det var særs glatt på staden.
– Entreprenørane er ute for å strø på vegane. Dei vil først strø på hovudvegane, før dei strør på sidevegane, seier Hove.
