ÅTVARER: Alvar Melvær i Sogn og Fjordane Turlag.
Foto: Torje Bjellaas / NRK
GRUVEFJELL? Her i Engebøfjellet, rett over fjorden for Gjøringebøskolten kan det bli storstila gruvedrift.
Foto: Kjell Arvid Stølen / NRK
PLANANE: Slik planlegg Nordic Mining gruvedrifta i Engebøfjellet.
Foto: Illustrasjon: Nordic miningTurlaget som er kritiske til gruveplanane i fjellet mellom Vevring og Redalen, fryktar vibrasjonar frå spreningar kan utløyse store ras i fjellet Gjøringebøskolten på andre sida av fjorden.
Det skriv Firda torsdag.
«Ei svær flodbølgje »
«Det stupbratte Gjøringebøfjellet er kjent som svært rasfarleg med store sprekker. Viss ei eller fleire store blokker skulle rase ut og i sjøen, vil det danne ei svær flodbølgje som vil gå ganske langt innover land og truleg utslette dei fleste av husa som står nær sjøen.»
Dette skriv turlaget i sitt høyringsfråsegn der dei ber Naustdal kommune om å seie nei til Nordic Mining sitt milliardprosjekt.
Rapport avviser fare
Men fagkunnige geologar deler ikkje turlaget si frykt.
Norges Geotekniske Institutt (NGI) som har vore innleigd av gruveselskapet, konkluderer i sin rapport at vibrasjonar og luftstøyt frå sprening i Engebøfjellet ikkje vil påverke Gjøringebøskolten.
NGI byggjer sine konklusjonar på undersøkingar gjort av det statlege NGU (Norges geologiske undersøkelse) som har gjort målingar på Gjøringebøskolten. Her vart det påvist ein sprekk i fjellveggen som er ein halv meter brei og om lag 50 meter høg.
Blokka på 30.000 kubikk kan vere utstabil, men har fått status som lågt prioritert med tanke på overvaking, skriv Firda.
Slaktar rapporten
Men turlaget slår seg ikkje til ro med dette.
– Undersøkingane verkar overflatiske. Rapporten frå Nordic Mining verkar harelabbprega, seier Alvar Melvær til avisa.
Han er sakshandsamar for turlaget og får støtte av den lokalkjende geologen Einar Alsaker i Sunnfjord Geo Senter i at fjellet bør overvakast ytterlegare.
– Men det meiner eg uavhengig av eit eventuelt gruveprosjekt i Engebøfjellet, seier Alsaker til Firda.
Geolog: – Fare for tsunami
Geologen deler derimot ikkje turlaget si frykt for at vibrasjonar frå spreningsarbeid skal sende fjellmassar i fjorden.
– Det reknar eg som heilt usannsynleg, seier geologen som ikkje utelukkar at fjellmassar på eit eller anna tidspunkt kan losne og forårsake ein tsunami i Førdefjorden.
Naustdal kommune skal ta stilling til gruvedrifta innan utgangen av året.
SJÅ TV-REPORTASJE: Synet på kor vidt gruvedrift er positivt eller negativt er svært ulike i Sunnfjord og Finnmark.
