– Det var kjempekjekt å få spele for Bremanger-publikumet igjen. Det er som å kome heim, seier Adam Douglas på ferja til Oldeide.
Han er på veg tilbake til det han omtaler som sin andre heim etter å ha vitja Ulsteinvik og NRK sin sommarbåt der han fekk spele for eit entusiastisk publikum på Sommeråpent.
Kjærleik ved første blikk
Torsdag opna han Rockweekend på Havly i Bremanger. Det var her amerikanaren hadde sin første spelejobb i Noreg i 2007, og det eine førte til det andre.
– Eg spelte på Rockweekend med eit band frå Sunnmøre, og der trefte eg Kristin. Det var kjærleik ved første blikk, seier Douglas, som no er gift med Bremanger-kvinna Kristin Solberg.
Saman bur dei i Oslo, og her har Douglas, opphavleg frå Oklahoma, blitt eit velkjend namn i musikkmiljøet. Han har i tillegg til eigne band spelt med mellom andre Frode Alnæs, Vidar Busk og Marit Larsen.
– Det er musikk eg kan, seier Douglas, som stort sett livnærer seg av musikken. I tillegg til eigne prosjekt underviser han litt ved sida av.
Debuterer med soloplate
Og sjølv om han har lang erfaring innan musikk er det først i år han platedebuterer som soloartist, med plata «I may never learn». Han er allereie radiolista på NRK P1 med den første singelen, «I once was an honest guy», same låten som han framførte på Sommeråpent laurdag.
– Foreløpig er plata berre tilgjengeleg gjennom strøyming, men til hausten kjem den i fysisk format – også i vinyl.
Til hausten vert det fleire spelejobbar og innspeling av ny singel.
Sjølv om han ofte vert omtala som soul-artist synest han det er vanskeleg å sette musikken sin i ein sjanger-bås.
– Eg seier ofte «americana», som vil sei ei slags blanding av ulik roots-musikk; country, soul, rock og folk.