Ein bil køyrde onsdag morgon inn i is som låg i vegbana på riksveg 15 ved Holmøyane i Eid. Ikkje lenge etter vart riksveg 5 ved Støylsnestunnelen i Kjøsnesfjorden i Jølster stengd ein kort periode på grunn av is- og steinras.
Frå fleire stader i fylket har det denne veka kome meldingar om isklumpar i vegen. Politiet ber folk følgje med og vere forsiktige.
– Meldingane har rent inn
Hos Vegtrafikksentralen har det vore mykje å ta tak i.
– Eg begynte på vakt klokka sju i dag og det har rent inn meldingar om stein- og isnedfall, spesielt i ytre delar av fylket. Det har vore mykje, seier Ketil Molvær ved Vegtrafikksentralen i Lærdal.
- Les også:
Han ber folk ta det med ro på vegane, særleg no i morgontimane når det er mørkt.
– Meldingane går stort sett på at mykje av dette kjem brått på rundt ein sving og at dei kanskje må hive seg over i feil køyrefelt. Så ta det med ro, spesielt der det er høge fjellskjeringar og tenk på at det kan ligge noko i vegen bak svingen.
Vil vare til neste veke
Førebels har meldingane om is og stein i vegane kome frå ytre delar av fylket.
Det vil komme ned endå meir utover dagen og ut i neste veke, ifølgje regiondirektøren i NVE, Brigt Samdal.
– Går vi fram ei vekes tid så vil temperaturen søkke igjen og då kjem vi under null og det frys fast igjen over heile fylket.
- Les også:
Det er ein lenger periode med kulde som er grunnen til at isen rasar.
– Og når vi då går over i ein vedvarande periode med plussgrader, så er vanleg at isen smeltar og losnar. Desse isblokkene som kjem er både store og harde å møte i ulike samanhengar, så her er det om å gjere å passe på og køyre forsiktig på vegane, seier Samdal.
Her har det kome meldingar om is onsdag morgon:
- Riksveg 5 Florø-Førde: Førde-Naustdal og Grov-Sundafjell – Mykje is i vegen
- Riksveg 5 Støylsnestunnelen, Kjøsnesfjorden – Is- og steinras stengde veg
- Riksveg 15 Holmøyane i Eid – Bil køyrde inn i is
- Riksveg 60 Vanbergstunnelen mellom Olden og Innvik – Store isklumpar dekkjer halve vegen
- Fylkesveg 609 Hundsåna mellom Førde og Askvoll – Mykje is i vegbana
- Fylkesveg 609 Stongfjorden-Askvoll – Ligg is fleire stader på strekningen
- Riksveg 55 Kyrkjebø-Vadheim – Mykje is i vegbana
- Fylkesveg 615 Devik, Hyen – Is i vegen