Laurdag 22. september i fjor blei ein dramatisk kveld i Sogn. Mannen hadde takka ja til å kome heim til mor si for å kose seg med taco, men då han kom dit blei stemninga alt anna enn god.
I ein fersk dom frå tingretten blir det skildra korleis han drog mor si gjennom huset og trua med at «ho måtte døy» og at «eg må drepe deg i kveld». Han hadde tatt med seg ein kniv han fann utanfor huset hennar.
– Han heldt deretter kniven mot brystet til fornærma. Ho tok tak i knivbladet og pressa kniven oppover, noko som medførte at ho fekk kuttskadar på hendene, står det i dommen.
Etter ei stund kom ein kamerat av tiltalte til huset. Mora fekk gitt eit signal til han om å kontakte politiet, noko han gjorde. Men straks etter drog sonen mora inn i stova der han stakk ho fleire gonger.
Ein lokal politimann var den første til å rykkje ut. Han væpna seg med pistol og fekk etter kvart støtte frå to kollegaer. Saman tok dei seg inn i huset for å overmanne den aggressive og utagerande mannen.
Sikta mot gjerningsmannen
I dommen blir det skildra slik:
«(...) sikta deretter med våpenet mot tiltalte, med fingeren på avtrekkaren og ropte "Slepp kniven, elles skyt eg».
Politimannen forklarte i retten at han ikkje såg det som forsvarleg å skyte sidan den knivskadde mora låg mellom han og gjerningsmannen.
– Tiltalte bøygde seg ned og høgg fornærma i kroppen raskt to til fire gonger med kniven. Han kasta deretter kniven frå seg, står det i dommen.
I retten kom det fram at tiltalte har slite med rusproblem i mange år og at han var rusa då han gjekk til angrep på mor si. Retten meiner uansett at det ikkje leggjast vekt på det og vurderte han som edru.
– Alvorleg sak
Mannen blei dømt til eitt års fengsel for knivangrepet. Han må også betale nær 50.000 kroner i erstatning fordi han øydela inventar i politibilen som skulle frakte han til arresten.
– Eg meiner at det er treft ei viktig og rettferdig avgjerd i denne saka, seier politiadvokat Malin Skeibrok Ånensen til NRK.
Det er opp til Statsadvokaten om saka skal ankast vidare, men det er lite truleg, seier Ånensen.
– Vi ser veldig alvorleg på saka. Det er alvorleg lovbrot som det er viktig å reagere mot.
Offeret i saka, mora, fekk ikkje alvorlege skader etter knivstikkinga.