– Det er litt irriterande at den gode statistikken vår i treningskampane ikkje held heilt inn. Vi var dårlege i første treningskamp mot Førde og i førsteomgang mot Hødd i dag. Elles har vi vore gode, seier Sogndal-trenar Jonas Olsson etter det 90 minutt lange antiklimakset i Sognahallen laurdag føremiddag.
Etter 24. minuttar glapp ein enkel ball ut av fanget til keeper Erik Dahlin. Espen Standal var vaken på den høgst uventa returen og nikka den i mål.
Sogndal fekk ikkje grep på kampen før i 2. omgang, men trass i stor dominans fekk heimelaget ikkje utteljing. Etter kvart som mange byter øydela rytmen i kampen var det faktisk Hødd som var nærast heilt mot slutten. Det førte likevel ikkje til anna enn at Sogndal-keeper Dahlin fekk oppreising etter den avgjerande tabben i 1. omgang.
