Bakke blir Sogndal sin nye hovudtrenar

Alt tyder på at det er temaet for pressekonferansen som Sogndal fotball har kalla inn til klokka 10. Det har lenge vore jobba med å finne ein erstattar for svenske Jonas Olsson som har vore Sogndal-trenar sidan før 2012-sesongen.

Sogndal-veteran og tidlegare utanlandsproff Eirik Bakke er etter det NRK kjenner til mannen som skal overta etter Olsson. Enten som trenar eller i ei managerrolle lik den Ole Gunnar Solskjær hadde i Molde. Bakke har også no ei sentral rolle som speidar og spelarrettleiar i klubben.

NRK forsøkte å få kontakt med Bakke torsdag kveld utan å lukkast.

Jonas Olsson stadfesta at 2014-sesongen blir hans siste for Sogndal under La Manga-cup tidlegare i år.

Styreleiar i Sogndal fotball, Tor Arne Ness, vil ikkje stadfeste at det er den nye Sogndal-trenaren som skal presenterast, men NRK har all grunn til å tru at det er det som skal skje på Fosshaugane Campus fredag.

Vil ikkje stadfeste

– Vi vil ikkje kommentere kva pressekonferansen gjeld. Den er klokka 10 og då vil vi informere om det vi skal informere om, seier Tor Arne Ness til NRK.

– Det blir hevda at de skal presentere ny trenar i morgon, kva er din kommentar til det?

– Som sagt så vil ikkje eg kommentere kva pressekonferansen i morgon gjeld.

NRK veit at det lenge har summa rykter om at Sogndal har funne ein arvtakar til Jonas Olsson. Den svenske trenaren blir uansett verande i klubben ut 2014-sesongen.

Ulrik snudde kampen

I går leia han laget til sin fjerde siger på seks seriekampar då Sogndal slo Vålerenga 2-0 heime på Fosshaugane. Han var ikkje minst nøgd med at Ulrik Flo kom inn i 2. omgang og sørga for at Sogndal snudde kampen.

– Ulrik har jo vore den som nesten alltid har starta, spring mykje og gjer ein god jobb for laget. I dag bytta vi litt på det og gav Kristan Fardal Opseth sjansen frå start. Så kom Ulrik inn og laga mål, så det fungerte jo veldig bra, seier Olsson.