Fungerande fylkeslege Jacob Andersen stadfestar at dei i dag sender brevet som varslar Helse Førde om tilsynssak etter hendinga for to veker sidan.
– Vi må undersøke om pasienten under innlegging fekk forsvarleg helsehjelp, eller om han var så svekka at han skulle hatt meir tilsyn, seier Andersen.
Trengde rullestol
Det har til no ikkje lukkast NRK å få kommentar frå fungerande fagdirektør i Helse Førde, Kristine Brix Longfellow. Mannen var dårleg til beins og sat i rullestol.
Då NRK omtala saka i førre veke presiserte Longfellow at mannen vart vurdert som skikka til å ferdast utan tilsyn. Han var utan tilsyn då ulukka skjedde.
– Vi har gått gjennom saka heilt opp til administrerande direktør, snakka med tilsette om hendinga og vi følgjer opp pårørande. Dette er tungt for alle involverte, sa ho.
Hentar inn uttaler
Etter ulukka har føretaket hengt opp skilt om at dørene til ei kvar tid skal vere stengd, men ikkje låst.
Andersen seier han på noverande tidspunkt er kjend med saka gjennom media og saksdokument han har fått frå Statens helsetilsyn.
– Vi går breitt ut og vil hente inn kopiar av pasientjournal og relevante rutinar og prosedyrar, samt uttalar frå overordna ansvarleg lege, sjukepleiar og føretaksleiing, seier han.
Hentar politidokument
– I tillegg vil vi hente inn kopi av politiet sine saksdokument som ledd i vår tilsynssak. Dei har meir mynde enn oss til å avhøyre personal og pasientar som har vore vitne, legg han til.
Konkluderer fylkeslegen med at pasienten fekk uforsvarleg helsehjelp, vurderer dei om saka er så alvorleg at den skal sendast Statens helsetilsyn.
Det er berre dei som kan gi administrative reaksjonar og som eventuelt kan melde ei sak til politiet.
Helse Førde får tre veker på seg til å svare fylkeslegen. Det er uvisst når tilsynsvurderinga er klar.