Under dagens treningskamp mot Sandefjord på La Manga, der Sogndal tapte 0-1, vart det berre nokre få speleminutt på guten som vart henta til Sogndal frå Eid hausten 2008.
- LES OGSÅ:
Likevel har sesongoppkøyringa så langt vore over all forventning for Eivind Daniel Røed. I januar var han i full trening att, og har spelt tre heile kampar, to av dei for A-laget mot Aalesund og Molde.
– Det har gått fortare enn eg trudde det skulle gå. Eg hadde ikkje trudd eg kom til å spele så mykje som eg har gjort no i januar og starten av februar, seier Røed.
Over to år med skader
Skademarerittet starta for fullt då han i 2009 vart operert for eit såkalla muskellosjesyndrom i leggane, der stor muskeltettleik skapte oksygenmangel i musklane.
- LES OGSÅ:
Etter det har det vore skade på skade, men no begynner Røed å sjå lys i enden av tunnelen, og er svært glad for at han har fått mykje speletid i det siste.
– Det har vore veldig heldig for meg at eg har fått spelt så mykje som eg har gjort. Det har vore litt småproblem med dei andre som spelar i same posisjon, og då opna det opp moglegheiter for meg. Eg treng den kamptreninga eg kan få, seier Sogndalspelaren.
(Artikkelen held fram under biletet)
Og forma er betre enn han hadde trudd, men fotballforma er endå ikkje heilt der han vil den skal vere.
– Den fysiske forma har vore bra og det er nøgd med. No klarar eg å ta ein plass i laget og vere trygg defensivt, men så må eg jobbe med å bli betre offensivt og bidra meir på min måte. Eg er litt meir forsiktig no, så eg har krefter til å vere defensiv, seier han.
- LES OGSÅ:
Mål å vere skadefri
Under torsdagens kamp vart det berre tre minutt speletid på Røed, men han håpar det blir meir i kampane framover. Første sjanse er mot Sandnes Ulf på måndag.
– Eg veit ikkje korleis det blir på måndag. Eg må berre trene godt og kjempe om speletid, men det får vi berre sjå. Eg håpar sjølvsagt å få spele, men vi er mange på den posisjonen no, seier den skadeutsette spelaren.
– Kva mål har du for sesongen?
– Det spørsmålet har eg fått fleire gonger, men eg vel å ikkje setje spesielle andre mål enn å halde meg skadefri. Om eg kjenner litt tendensar til slitasje i kroppen må eg berre ta nokre dagar fri til eg er bra att i kroppen for å halde den gåande. Eg trur ikkje eg har hatt ei heil sesongoppkøyring på fem år, og eg begynner å nærme meg å klare det no, så vi får prøve å halde det ut sesongen. Så får alt anna bli eit pluss, seier Røed.