Det var tilløp til forvirring då politikarane i fellesnemnda, som planlegg det nye Vestland fylke, skulle røyste over godtgjersla til politikarane i det framtidige fylket.
Innstillinga frå arbeidsutvalet ville gje meir løn til folkevalde enn dei to fylka brukar i dag. Forslaget om å gje millionlønn til fleire av politikarane har siste dagane skapt debatt. Tre endringsforslag skapte også debatt i fellesnemda.
Skilte berre 80.000 kr
Ingen i nemnda ville auke løna til politikarane, slik arbeidsutvalet kom med forslag om.
– Vi vil ta utgangspunkt i forslaget frå arbeidsutvalet, men reduserer lønsforslaget til fylkesordføraren og fylkesvaraordføraren og regulerer godtgjersle til medlemmane av fylkesutvalet etter det. Då er vi nær dagens ramme, sa fylkesordførar i Sogn og Fjordane, Jenny Følling (Sp). Ho la fram eit felles endringsforslag frå Sp, Ap og KrF.
Frp-politikar Roald Stenseide kom med eit forslag frå Frp, Venstre og Høgre, om ei samla godtgjersle på 300.000 kroner under dagens nivå.
– Løna bør ikkje bli høgare. Det nye fylket står framfor tunge utfordringar. Då bør politikarane halde seg innanfor ramma.
Under gruppemøte var skilnaden mellom dei to forslaga på 80.000 kroner. Likevel klarte dei ikkje om å bli samde. Til slutt fekk endringsforslaget til Sp, Ap og KrF fleirtal.
Mindre på fylkesordføraren
Med det vedtekne reglementet vil kostnaden med godtgjersle til politikarane i nye Vestland samla bli på det same dei to fylka brukar i dag.
Den komande fylkesordføraren i nye Vestland vil få ei løn på 1,2 millionar kroner, medan den komande fylkesvaraordføraren vil få 976 500 kroner.