Den kanadiske kvinna på 24 år vart sist sett søndag morgon. Ho kom aldri heim frå fjellturen til Vidmesnosi i Flåm søndag, og vart meldt sakna då ho ikkje kom på jobb måndag morgon.
Måndag ettermiddag og kveld har store styrker leitt etter kvinna. Like etter klokka 20.00 vart kvinna funnen død.
– Kvinna blei meldt funnen 20.01 av redningshelikopteret, som fann ho på nordsida av Vidmesnosi, som er like i nærleiken av turområdet ho hadde tenkt å gå i, seier operasjonsleiar for politiet, Trond Hatlenes.
Funnen i bratt terreng
Måndag kveld har politiet jobba med å få varsla dei pårørande gjennom den norske ambassaden i Canada og det canadiske politiet. Mest truleg har kvinna falle, ifølgje politiet.
– Vi veit ikkje akkurat kva som har skjedd, men ho vart funnen i eit stygt område, som tilseier at ho kan ha falle. Det var veldig bratt der, og ikkje eit slikt terreng som ein normalt ville ha ferdast i, seier Hatlenes.
Den omkomne har jobba som turistguide i Flåm i fleire turistsesongar, og skal ha brukt fjella i området hyppig.
Store styrker deltok i leitinga
Det var klokka 12.30 at politiet først melde om leiteaksjonen. Det vart først gjort søk med bakkemannskap frå Røde Kors og Norske Redningshunder. I tillegg har Sivilforsvaret og redningshelikopteret frå Florø delteke i leitinga.
Seinare på ettermiddagen og utover kvelden vart leitemannskap frakta med helikopter opp i fjellet for å leite etter kvinna. Klokka 18.00 vart også eit politihelikopter sett inn i søket.
Den omkomne blir no sendt til Gades institutt for obduksjon, for å kunne fastslå dødsårsaka. Det er usikkert når familien i Canada kan vente å få kvinna heim igjen.