Stortingsrepresentant Liv Signe Navarsete hadde hand om saksa då dei tre nybygga med studenthyblar vart opna i Sogndal i dag. Heile 144 nye studentbustadar knytte til Høgskulen i Sogn og Fjordane, kan no takast i bruk i Sogndal.
– Vi har fått berre positive tilbakemeldingar, og nokre er veldig positive, seier direktør i Studentsamskipnaden i Sogn og Fjordane, Randi Marie Sjøholt.
BLOKK: Slik ser ho ut, blokka som skal huse om lag 150 studentar.
Foto: Sigrid Skjerdal / NRK– Lettar presset
Bustadmarknaden i Sogndal har i mange år budd på problem for studentane, og håpet er at dei nye bustadane skal gjere situasjonen betre for nye studentar.
– Dette har nok letta presset på bustadsituasjonen ganske kraftig. Det vil nok vere ventelister ved semesterstart i år, men det har vi alltid hatt, seier Sjøholt.
Sogndal skal no ha ein betre dekningsgard på studentbustadar enn byar som Oslo og Bergen.
STOLT DIREKTØR: Randi Marie Sjøholt i Studentsamskipnaden i Sogn og Fjordane.
Foto: Sigrid Skjerdal / NRK– Framleis behov for private
Stortingsrepresentant for Senterpartiet Liv Signe Navarsete stod for den høgtidlege opninga av dei nye hybelbygga i dag, og ho er glad for at lenge etterlengta studentbustadar er på plass.
– Dette vil vere med på å hjelpe på bustadsituasjonen til studentane. Men det vil òg i framtida vere behov for at private stiller hus til disposisjon, seier snorklippar Navarsete.
Sjølv om dei nye studenthyblane vil påverke dei private utleigarane i Sogndal, meiner Navarsete at det er butilhøva til studentane som må prioriterast.
– Kanskje marknaden kan få litt tyn, det trur eg ikkje er så nøye. Folk skal ha skikkelege tilbod, det skal vere skikkelege hyblar. Å bu godt betyr mykje for å kunne jobbe bra.
