– Vi følgjer situasjonen time for time. Det er store nedbørsmengder, og alt etter korleis dei treffer, så kan det bli store vassmengder, seier regionsjef i NVE, Brigt Samdal.
Meteorologisk institutt har sendt ut OBS-varsel for Telemark, Agder-fylka og heile Vestlandet. I tillegg til dei store nedbørsmengdene er det venta liten til full storm i fjellet og langs kysten.
- Her kan du sjå kor det regnar mest akkurat no
Vatnet trekkjer ikkje ned i jorda
At det har vore ein turr og fin haust, har mange nytt godt av. Men når det brått pøsar ned store mengder nedbør, er ikkje knusktørr grunn berre positivt.
– Når no den første regnskuren kjem, ventar vi at det kan føre til utfordringar i fleire kommunar, seier Samdal.
Han peikar på at det i einskilde område kan bli svært krevjande.
– Nokre stadar kan bakken ta opp i seg ein del av nedbøren, men vert det veldig intenst, så kan nedbøren berre renne vidare på toppen av overflata og ned i elvane. Det kan gje utfordringar, seier Samdal.
- Her kan du sjå vinden akkurat no (kartet er henta frå earth):
Ver litt på alerten
Det kan til dømes bli vaska ut steinar i bratte område, og faren for steinsprang aukar.
– Det er viktig å følgje med på terrenget rundt seg. Rett og slett vere litt på alerten, seier Samdal.
Samdal oppmodar folk om å sjå til at alle rister og kulvertar er reinska, slik at vatnet får renne fritt.
– Hald eit auge med at elvane ikkje får ta nye far, seier Samdal.