– Drifta i rekordåra var prega av armar, bein og dugnadsand. Dersom ein nøkkelperson hadde fått ein stein i hovudet, ville mykje klappa saman, seier Nils Are Karstad Lysø til Bergens Tidende.
Han har vore dagleg leiar i Moods of Norway sidan 2009, fire år prega av stor vekst. I 2011 tok eigaren ut eit utbyte på om lag 50 millionar kroner.
– Då eg byrja i 2009 hadde den eine av dei tre gründerane heile butikken i baklomma. Vi kunne ikkje halde fram på den måten, seier Lysø til avisa.
Store investeringar dei siste åra
Medan meir enn kva tredje krone av omsetnaden gjekk til overskot for eigarane i 2010 og 2011, vart overskotet på beskjedne 19 millionar i 2013.
Men til trass for at overskotet har gått ned, har omsetnaden auka jamt og trutt, også i 2013 då omsetnaden var på 344 millionar kroner.
Dei har ifølgje Karstad Lysø tent mindre pengar, fordi dei har gjort ting annleis enn i rekordåra «prega av armar, bein og dugnadsand».
Lysø, som no skal overta som styreleiar i Moods of Norway, seier til BT at forklaringa på mindre pengar til eigarane er mange nye investeringar i IT-system, kvalitetskontroll, at dei har styrka organisasjonen i fleire land og det nye stor-lageret i Stryn.
- LES OGSÅ: Moods kuttar tilsette
- LES OGSÅ: Suksess for Moods-frimerke
Ikkje utbytte i år
Ifølgje Virke var Moods of Norway kleskjeda med nest høgast salsvekst i fjor, til trass for at salet av klede gjekk ned i Norge, skriv avisa.
Lysø forklarar at den samla veksten vart lågare enn venta i fjor, på grunn av at dei har bygd organisasjon og system, og slik fått kostnadar som trekkjer lønnsemda ned.
– Det blir dermed ikkje noko utbytte i år, seier Lysø til BT.
I dei fire heile åra Lysø har vore dagleg leiar i Moods, har vore ei suksesshistorie. Det samla overskotet før skatt har til saman vore 258 millionar, med ein omsetnad på 1245 millionar.
Selskapet har i dag 430 tilsette og 24 eigne butikkar.