Den pensjonerte politimannen frå Gaular var ikkje sein å be då han vart spurt om å stå som listetopp for Senterpartiet i årets kommuneval. Men Leif Bell har for alvor fått merke at det er veljarane som bestemmer.
Bell er så upopulær blant dei som røysta i kommunen at han ikkje ein gong kom inn i kommunestyret.
– Demokratiet kan vere ei ganske så brutal styreform frå tid til annan, seier Bell.
– Ein snakkar om vinnarar og taparar i valet, kva føler du deg som?
– Det er definitivt som ein tapar, seier Bell til NRK.no.
Sitjande ordførar mest populær
Bell gjekk nyleg av i jobben som operasjonsleiar ved Sogn og Fjordane politidistrikt. Pensjonisten håpte han kunne få nye arbeidsoppgåver, nemleg som ordførar for Senterpartiet i Gaular. Men etter at veljarane har fått sagt sitt blir det ikkje slik.
For dei som gjekk til valurnene i Gaular har nemleg ein annan favoritt. Sitjande ordførar, Senterpartidronninga Jenny Følling stod på 15. plass på lista.
Men etter at ho fekk til saman 209 personstemmer, i form av personstemmer og såkalla slengarar frå andre partilister, så er ho no vald inn i kommunestyret.
– Det er alltid kjekt å gjere gode val, så dette var kjekt å høyre, seier Følling til NRK.no.
(Artikkelen held fram under biletet)
IKKJE ETTER PLANEN: Jenny Følling stod på 15. plass på lista, men var så populær at ho enda opp på 1. plass. – Dette var ikkje slik eg hadde tenkt det, seier Følling.
Foto: Erlend Blaalid Oldeide / NRKBell: – Det er vanskeleg å setje ord på
Følling blir dermed ein av seks representantar for Senterpartiet i det komande kommunestyret. Ein av desse plassane var tenkt til listetopp Bell, men også fem andre Sp-politikarar fall meir i smak hos veljarane. Bell er rett og slett ikkje populær nok.
– Det er heilt tydeleg at veljarane synst andre Senterpartikandidatar var meir populære og meir verdige å stemme på, seier Bell.
Han vedgår at det er litt surt at han ikkje ein gong fekk plass i kommunestyret, sjølv om han stod som førsteplass på lista.
– Lei meg og lei meg. Det er vanskeleg å setje ord på, men litt skuffa er eg, seier Bell.
- LES OGSÅ:
- LES OGSÅ:
Følling: – Nesten litt dårleg samvit
For Følling vart ting langt ifrå slik ho hadde tenkt det. Ho hadde ikkje ein gong tenkt å halde fram i kommunepolitikken og stod på lista for å gje støtte til partiet i heimkommunen.
Følling har fått rolla som fylkesvaraordførar og vil konsentrere seg om denne jobben i dei fire åra framover. Ho har nesten litt dårleg samvit for at Bell er blitt skvisa ut.
– Ja, nesten, ler Følling.
(Artikkelen held fram under)
VARA: Leif Bell stod som listetopp, men fekk til slutt ikkje plass i kommunestyret.
– Det kan nok bli fleire innhopp
Ho trur samtidig at det fort kan bli til at Bell får både eitt, to og tre innhopp i kommunestyret. Han er no første vara for Sp i kommunestyret.
– Kan det tenkjast at du blir så mykje vekke og så mykje oppteken med jobben som fylkesvaraordførar, at Bell endar opp med å møte ganske så ofte i kommunestyret i staden for deg?
– Eg trur han kjem til å få møte ein god del i kommunestyret, ja, seier Følling.
For Bell er dette godt nytt. Sjølv om han ikkje vil kalle seg arbeidsledig pensjonist vil han gjerne ta i eit tak i politikken.
– Eg har framleis litt arbeidskraft igjen, så vi får sjå kva det blir til, smilar Bell.
