– Vi har avhøyrt eitt vitne, men ynskjer informasjon frå dei som har kunnskap om kva som har skjedd, seier tenestestadleiar for politiet i Årdal, Magne Knudsen, tredje juledag.
Brannvesenet tok ingen sjansar og rykte ut med alt tilgjengeleg mannskap då det byrja å brenne i ein bosscontainer som stod oppetter veggen til Farnes kyrkje.
Naboar varsla om brannen klokka 00.49 og brannvesenet var raskt på plassen med fleire vaktlag.
Politiet mistenkjer at nokon med vilje kasta brennande fyrverkeri i dunken.
– Vi har søkt etter folk og spor i området. Vi mistenker ikkje at dette er eit forsøk på å tenne på kyrkja, men vi ser på det som alvorleg skadeverk, opplyste politiet torsdag.
Om ikkje kyrkjeveggen hadde vore av teglstein, kunne hendinga fått dramatiske følgjer for kyrkja. Kyrkjeveggen fekk noko skadar og lokala vart fylt med røyk.
– Brann uansett tid og stad, likar vi ikkje. Difor ynskjer vi at personen eller personane som har kjennskap til eldspåsetjinga, for det må det vere, tek kontakt, seier Knudsen.
Det var Ivan Øy som tilfeldigvis oppdaga brannen.
– Vi såg at det var røyk og sprang bort for å sjå, fortel han til NRK.
Alarmsentralen i Sogn og Fjordane fortel at brannvesenet har sett inn ei stor vifte i kyrkja for å ventilere ut røyken frå Farnes kyrkje.
Trur det var påtent
Årsaka til at det byrja å brenne i containeren er førebels uklart, men det vil politiet forsøke å finne ut av.
Sokneprest Olav Nese i Øvre Årdal seier til NRK at han først blei klar over brannen i morgontimane torsdag. Han tvilar på at det kan ha starta å brenne av seg sjølv.
Det var ikkje planlagt gudsteneste i kyrkja i dag.