I går tikka det inn ei sjokkmelding frå sentralskattekontoret til kraftkommunar.
Den fortel om nye verdifastsetjingar av kraftverka og legg grunnlaget for kor mykje inntekter kommunane kan vente seg i eigedomsskatt på verker og bruk neste år.
Noko av uføret skuldast låge kraftprisar som gjev dårlegare inntening og som påverkar verdien på kraftverka. Dette igjen påverkar kva kraftverka må betale i eigedomsskatt til kommunane dei er plassert i.
Innhaldet i meldinga har potensial i seg til å vere nær katastrofale for enkelte av kommunane:
- Lærdal budsjetterte med 15 millionar i eigedomsskatt for 2017. Det kan bli redusert med 6,6 millionar kroner – cirka 44 prosent.
- Aurland budsjetterte med 55 millionar kroner. No kan kommunen miste over 10 millionar – nær 20 prosent.
- Årdal kommune kan miste 2,7 millionar.
- Luster kommune kan tape nær 12 millionar.
- Vik kan miste 5 av 16 millionar, og mister også andre kraftinntekter.
Store følger
Nedgangen er så stor at det kan få alvorlege følger for fleire kommunar.
– Eg er bekymra. Vi har ikkje fått tala stadfesta, men dei ser reelle ut. Og då er det svært ille, seier ordførar Jan Geir Solheim i Lærdal kommune.
Nedgangen kjem på toppen av nedgangen i same eigedomsskatt i fjor. For Lærdal kommune, som frå før slit økonomisk, er tala alvorlege.
Nedgangen er også stor i nabokommunen Aurland, som er den største kraftkommunen i fylket. Aurland budsjetterte med 55 millionar i eigedomsskatt på verk og bruk i 2017.
– Vi får ein nedgang i overkant av 10 millionar kroner. Viss dette går igjennom er det heilt klart ein alvorleg reduksjon i inntektene våre. Vi veit at det er dårlegare inntening i kraftbransjen, men vi hadde ikkje rekna med at det skulle få så store utslag, seier Distad.
Dramatisk
I Terra-kommunen Vik kallar rådmann Oddbjørn Ese tala for dramatiske.
– Vi har andre inntekter frå kraftverka som lir same skjebne. Samla blir det store tal, samla er dette dramatisk, seier Ese.
I Høyanger seier økonomisjef Ingvar Linde at dei ikkje har tala klare enno. Det hadde dei heller ikkje i Bremanger kommune måndag kveld, ifylgje rådmann Tom Joensen. I Luster torde ikkje ordførar Ivar Kvalen å spå noko, men frykta stygge tal og skal sjå nærare på situasjonen tysdag.
Hjå Landssamanslutninga for vasskraftkommunar prøver dei å få inn alle tala frå medlemskommunane sine.
– Vi arbeider med å få ei oversikt, seier Thea Karoline Bogen i sekretariatet.