Jublar over strålande fiskestart - tok opp 110 laksar på første veka

– Vi er veldig nøgde med laksefisket så langt. Første veka vart det registrert om lag 110 laks, seier leiar Lærdal elveeigarlag, Lasse Sælthun.

I 2013 vart det for første gong på 17 år opna for laksefiske i Lærdalselvi. Lakseparasitten Gyrodactylus salaris infiserte elva i 1996, og sidan vart det kjempa ein lang kamp for å bli kvitt parasitten.

• LES OGSÅ: Dette har han venta på i 17 år
• LES OGSÅ: Her er den første laksen på 17 år

Tok 16 år å bli kvitt parasitt

Trass i sterke protestar, mellom anna frå Norges miljøvernforbund, vart fisken i heile Lærdalsvassdraget totalt utrydda med gifta rotenon i 1997.

Om lag 3000 sjøaurar og 200 laks strauk med etter giftkuren, men trass i ny kur seinare same år, vart ein ikkje kvitt parasitten.

I 2005 vart det starta eit forsøk på å utrydde parasitten med såkalla surt aluminium, i kombinasjon med rotenonutslepp. I 2012 starta nok eit forsøk, og totalt kom prislappen på utrydding av parasitten på 45 millionar kroner.

Sælthun er forsiktig med å samanlikne starten på årets fiske med tida då elva hadde sin gullalder.

– Reint historisk er det vanskeleg å hugse. Men det er bra, samanlikna med i fjor, slik som vi hugsar det. Vi må hugse at vi berre fiskar med fluge, og ikkje anna utstyr. Eg tykkjer det ser veldig, veldig bra ut, seier Sælthun.

• LES OGSÅ: Drog i land laks på 22,5 kilo
• LES OGSÅ: Her har dei landa 500 laksar på fem veker

Har godt innsig

Han understrekar at meir enn 75 prosent av fisken vert sett ut at i Lærdalselvi.

Men med ein slik start på laksefiske, skil Lærdalselvi seg ut, samanlikna med andre elvar i Norge.

I dei store elvane i Sør-Trøndelag har starten på årets laksesesong vore rekordsvak, og lokale foreiningar har hatt krisemøte for å diskutere om elvane bør stengjast for fiske.

– Etter dei rapportane vi har fått her, så kan eg ikkje sjå at det kjem til å bli eit aktuelt tema her hjå oss. Så langt har vi hatt eit godt innsig av laks, seier Sælthun.

• LES OGSÅ: Laksefisket nesten som i gamle dagar
• LES OGSÅ: Let seg imponere av Lærdals-laksen

Trur sesongen blir god

Han peikar på at fisket har vore jamt godt heile veka.

– Det vart sjølvsagt teke flest dei første dagane, men eg var seinast inne på loggen i dag tidleg, og også i dag er det teke fisk, seier Sælthun.

Han meiner elva for tida har ein fin storleik, og at alle tilhøve ligg godt til rette for eit godt fiske.

– Det er mange nøgde fiskarar i Lærdal, skal vi tru rapportane vi har fått, og det set vi jo pris på, seier Sælthun.

• LES OGSÅ: Han har vore klepparen til Kong Harald, no møter han Kongen som rådmann i Lærdal
• LES OGSÅ: - Endeleg min tur! Knuste familierekordane