Det er venta mykje regn på heile Vestlandet. I Sogn og Fjordane vil det regne mest i indre strok.
– Det kjem hovudsakleg i kveld og i natt. Det er då den største nedbøren kjem i indre strok. Men det vil også komme ein god del nedbør i ytre strok, seier Mette Skjerdal ved Vervarslinga på Vestlandet.
– Er det noko spesielt folk må passe på?
– Pass på at slukar er opne. Ein bør også halde seg unna store elver på grunn av auka vassføring.
Fare for jorskred
Dei som bur i indre strok må også rekne med ein del vind i dag.
– Det kan bli kraftig vind får søraust og kraftig høgdevind som slår ned i fjordane. På kysten er det roleg, men her blir det liten kuling spesielt rundt Stad i morgon.
Det er også varsla lyn og torden på deler av Vestlandet i løpet av tordagen.
Medan det er sendt ut OBS-varsel om flaum for deler av Austlandet, er det jordskred som er faren i vest på grunn av dei store nedbørsmengdene og relativt høge temperaturar. Ifølgje yr.no er det bratte skråningar og bekkar og elveløp med stor vassføring som er spesielt utsette.
– Det er gult varsel for jordskred for heile Vestlandet, seier Skjerdal.
Etter regn kjem sol
Men trass i ein grå torsdag, er det betre ver i vente. Meteorologen seier helga blir fin.
– Det blir ein heilt annan dag i morgon. Det blir periodar med sol og temperaturen vil stige. Det same gjeld laurdag og søndag.
REGN: Slik ser det ut vertenesta til yr.no klokka 12.
Foto: yr.no
