– Eg sat og såg den fantastiske kvartfinalen mellom Hødd og Haugesund, og etter kampen stod det klart for meg at eg måtte på semifinalen. Men det er stor rift om desse billettane ettersom det er fotballfeber på Søre Sunnmøre.
Og Høddvoll ikkje er blant dei største fotballarenaene i landet, så difor tok Hødd-patrioten og Firda-journalisten i bruk eit velkjent mediaknep.
– «Offer» i media
– Som gamal bladfyk veit eg at det kan hjelpe å stå fram som «offer» i media. Difor tok eg fram traumatiske opplevingar frå barndommen for å smiske meg inn med Hødd.
Longvastøl skreiv eit innlegg på Facebook og la det på heimesida til Hødd. Der spela han på at Hødd hadde snytt han for diplom frå søndagsskulen heime i Vartdal.
– Vanvittig respons
Og bøna på Facebook bar frukter. Etter ein time var mediesjef Lars-Petter Rønnestad på tråden og spurde kor mange billettar han trengde.
– Det er klart vi fall for ei slik god historie. Longvastøl er ein luring. Og no er semifinalen mot Brann utseld. Vi har plass til 4300. Men no prøver vi å utvide kapasiteten noko.
Og Rønnestad var ikkje den einaste som gav lyd frå seg.
– Det var ein heilt vanvittig respons. Det var til og med folk som ville hjelpe meg med billettar til finalen på Ullevaal.
Så no blir det biltur frå Naustdal til Ulsteinvik om ein god månad. Og Longvastøl får selskap i bilen.
– Ein annan gamal Hødd-patriot, Hans Jakob Reite, blir med, og så går det rykte om at Brann-patrioten Stian Sjursen Takle kanskje skal vere med, men det får vi no sjå på. Det kan i så fall bli harde tak.