Gravemaskina velta under rivingsarbeid på riksveg 55 ved Fardal i morgontimane på måndag. Det var Sogn Avis som først omtalte saka.
– Ved rivinga hengte piggen på maskina seg fast, samtidig som brua fall ned. Maskina stod på land, men brua drog den med seg, seier byggeleiar i Statens vegvesen, Jan Ole Liljedal.
Inne i gravemaskina sat sjåføren som måtte krabbe ut. Fallet var på to til tre meter.
– Sjåføren var oppegåande. Han blei sendt til legen for ein sjekk.
Ein kranbil skal fjerne maskina og Statens vegvesen skal no evaluere hendinga.
– Vi skal ta ein runde på kva som har skjedd, og kva vi kan gjere for å unngå sånne ulukker.
