– Løna til administrerande direktør er den einaste lønsposten som styret har ansvar for, og den blir samordna med resten av Helse Vest. Vi må liggje nokonlunde på linje med dei andre føretaksstyra når det gjeld løna til direktøren, seier styreleiar i Helse Førde, Jorunn Ringstad.
Tener meir enn ministeren
Det er styret i Helse Førde som avgjer kva administrerande direktør Jon Bolstad skal få i løn kvart år. I fjor fekk han vel 1,4 millionar kroner før skatt, ein auke frå 2012 på nær 70.000 kroner. Det er til dømes langt meir enn helseministeren, som har ei årsløn på om lag 1,2 millionar.
– Eg har ikkje så sterke meiningar om kva løna bør liggje på, men vi må innordne oss det systemet som er. Og det ville vore urimeleg om vi skulle føre ein heilt annan lønspolitikk enn dei andre føretaka i Helse Vest og resten av landet, sler styreleiaren fast.
- LES OGSÅ:
– Vi må innrette oss
Fleire på direktørnivå i Helse Førde har ei årsløn på over millionen. Styreleiar Jorunn Ringstad meiner at det ikkje er helseføretaket sitt ansvar å vurdere lønsnivået på leiarnivå.
– Eg kan ikkje gå inn og byrje å samanlikne statsråd og andre sine løner. Vi må innrette oss og det er systemet vi må halde oss til. Vi kan ikkje samanlikne med alle andre verv og stillingar i landet, meiner Ringstad.
Føretaket gjekk med overskot i fjor
Administrerande direktør Jon Bolstad ønskjer ikkje å kommentere si eiga løn. Men han kommenterer meir enn gjerne at helseføretaket kjem ut med eit rekneskapsmessig overskot på nær ein halv million kroner i 2013.
– Eg er glad for å kunne legge fram eit positivt resultat, og særleg at vi gjer dette samtidig med at pasientbehandlinga vår skårar svært høgt på nasjonale kvalitetsmålingar, seier Bolstad i ei pressemelding.
NB: Tala syner løningane for 2013. Tore Dvergsdal har etter dette slutta i helseføretaket.