Kanskje har litt ekstra mange i Sogn og Fjordane blitt vêrsjuke denne sommarmånaden.
Meteorologen si oppsummering av juli viser at fleire stader i fylket har hatt ein over snittet våt månad. Sjølv om det ikkje er snakk om rekordar, har det vore meir enn nok regn for mange.
- Les også:
Statsmeteorolog Mette Skjerdal ved Vêrvarslinga på Vestlandet hadde i går ikkje kjempegode nyheiter for helga.
– Det blir bygevêr og regnbyer både laurdag og søndag, sa Skjerdal fredag ettermiddag.
Laurdag vakna mange i fjordfylket opp til eit gløtt av både sol og blå himmel. Ein telefon til Vêrvarslinga på Vestlandet stadfestar at det kan bli litt meir av det utover dagen.
– Innimellom kan ein få gløtt av sol, men det er nok i utgangspunktet bygevêr i heile dag, seier Gitte Flesland ved Vêrvarslinga som godt kan forstå at folk skulle ønske seg andre nyheiter.
– Det blir byeaktivitet i morgon også, men det er moglegheiter for at det blir litt lettare utpå ettermiddagen. Men det er ikkje noko fint vêr å snakke om, seier ho.
Om ein vel å stole på Yr.no så ser det ut til fleire stader i fylket i løpet av laurdagen kan få lengre periodar med opphaldsvêr og sol i dag. Til dømes ligg det an til ein fin ettermiddag i Askvoll og Florø, medan det i Sogndal ser finast ut litt tidlegare på dagen.
I Skjerjehamn, der Utkantfestivalen går av stabelen denne helga, ser det også ut til å bli sånn passe bra, med fleire periodar med opphald og sol.
Ser ein litt framover er det venta meir nedbør inn over Sogn og Fjordane frå måndag av.
– Også i starten av neste veke er det byevêret som dominerer, seier meteorolog Skjerdal.
