Denne er ikkje laga av norske eple

I programmet «Matagentane» på TV2 kjem det fram at eplejuicen til Lerum ikkje er slik folk kanskje hadde trudd den var.

Utanpå juicekartongen er det nemleg bilete av friske, grøne eple med Sognefjorden i bakgrunnen. Om du ut frå dette trudde at juicen er laga av eple frå nettopp dette området tek du feil. Eplekonsentratet og aromaen er polsk, skriv TV2 på sine nettsider.

– Om vi har villeia folk til å tru at epla i denne konsentratjuicen er frå Sogn, så beklagar vi det på det sterkaste, seier administrerande direktør i Lerum, Trine Hjellhaug Lerum til NRK.no.

Forbrukarrådet er skeptiske

Gunstein Instefjord som er fagdirektør for mat og handel i Forbrukarrådet er ikkje heilt nøgd med måten Lerum har framstilt eplejuicen på. I ein reklamefilm blir det også gitt inntrykk av at eplejuicen er eit heilnorsk produkt.

– Det er ingen tvil om kva som er inntrykket når ein ser på denne reklamefilmen. Det er at det både er produsert i Sogndal og med råvarer frå Sogn. Vi synest dette er villeiande, seier Instefjord til TV2.

Han seier mange forbrukarar er opptekne av kor råvarene kjem frå og kven som har produsert dei. Oppmodinga til Lerum er difor å rette opp inntrykket.

– Enten må dei endre inntrykket som blir gitt, eller så bør dei opplyse om at dette ikkje berre er polske råvarer, men også delvis produsert i Polen, seier han til tv-kanalen.

• LES OGSÅ: Krever nye merkelapper på maten
• LES OGSÅ: Fisken kan være fryst tre ganger

Har fjerna reklamefilm

Etter at TV2 var i kontakt med Lerum om denne saka har selskapet no fjerna den omtalte reklamevideoen frå sine nettsider.

Administrerande direktør Trine Hjellhaug Lerum seier til NKR.no at reklamefilmen er frå 2008, og at den ikkje har blitt brukt aktivt sidan då. Ho forstår at filmen kan ha blitt misforstått, og seier det er viktig for Lerum å lære av denne saka.

– Det er veldig viktig for oss å vere bevisste på korleis vi kommuniserer for at forbrukarane våre skal forstå bodskapen vår, seier ho til NRK.no.

• LES OGSÅ: Nynorsksatsing gav næringslivspris
• LES OGSÅ: Lerum gjekk 21,2 millionar i pluss

– Det finst ikkje nok norske eple

– På kartongen har vi bilete av utanlandske eple og Sognefjorden. Med bilete av Sognefjorden har tanken vore å kommunisere kven vi er, kor vi kjem frå og at produktet blir produsert i Sogn, seier Lerum-direktøren til NRK.no.

Hjellhaug Lerum seier vidare at det ikkje er nok norske eple til at dei kan basere all sin eplejuiceproduksjon på norske råvarer. Lerum sin Eplemost frå Sogn er derimot laga av norske eple, medan eplejuicen altså er laga av konsentrat frå Polen.

– Det er eingong slik at det ikkje er nok norske eple, difor har vi utanlandske eple i denne.

– Kvifor kunne det då ikkje berre stått på pakken, slik at dei som var interessert i det kunne lese at her er det snakk om konsentrat frå Polen?

– Per i dag er det ikkje krav i regelverket til opphavsmerking, men det kan bli krav, og då må vi innrette oss etter det.

– Men er ikkje då forskriftene i seg sjølv litt villeiande?

– Det må dei som har laga forskriftene svare for.

Håpar folk framleis vil velje Lerum

Hjellhaug Lerum seier at det generelt ikkje er nok norske råvarer til alle deira produkt, men understrekar at dei tek inn så mykje av norske råvarer som dei kan.

Dersom det skulle bli krav til opphavsmerking vil Lerum altså følgje dette. I framtida kan det dermed stå på eplejuicen at den er laga av konsentrat frå Polen.

– Trur du folk vil kjøpe mindre av dette eller andre produkt om dei veit at råvarene kjem frå eit anna land?

– Eg trur smak og kvalitet er viktig for forbrukarane. Og eg håpar dei vil halde fram med å kjøpe våre produkt fordi dei smakar godt, seier ho og legg til:

– Når vi ikkje får tak i nok råvarer i Norge, så har vi ikkje noko anna val enn å ta inn råvarer frå utlandet. Og dei har også god kvalitet.