Natt til Sundag gjekk ein falsk brannalam ved Rica Sunnfjord Hotell. Petter Olav Rygg, som gjesta hotellet same natta, er ein av dei som har komme med sterk kritikk mot brannrutinane ved hotellet. Han vakna ikkje av alarmen, men blei henta av ein kamerat som hadde fått beskjed av personalet om at dei måtte evakuera.
Brannmeisteren reagerer
Brannmeister Leif Otto Olsen syns ikkje det høyres særleg trygt ut, og seier at dei sannsynlegvis kjem til å ta kontakt med hotellet for ei utgreiing av tilhøva. Han fortel vidare at dei har gjort kontrollar som har vist at hotellet føl krava om brannvarsling og branntryggleik. Sist ein slik kontroll blei utført var i juni 2004.
Eigar sitt ansvar
Det er fyrst og fremst eigaren av hotellet som har ansvar for branntryggleiken. Eigar må syte for at det blir valgt ein brannvernleiar som vidare har ansvaret for til dømes internkontrollar. Hotellet må òg utføre brannøvingar 1-2 gonger i året.
Brannmeisteren har ikkje høyrd om liknande situasjonar ved andre hotell i fylket, og brannvesenet har ennå ikkje teke stilling til om dei vil gjera tiltak mot hotellet etter hendinga.