Mannen, med artistnamnet «Gaahl» skal ha mishandla ein annan mann frå Sunnfjord på det grovaste i fleire timar. 29-åringen vil nekte straffeskuld når rettssaka mot han startar i Førde dag, fortel forsvarar Christian Eckhoff.
Black metal-vokalisten frå Fjaler risikerer ni års fengsel for særs grov vald. I tillegg vil bistandsavdokat Robert Fonn kreve om lag 100.000 kroner i oppreisning til sin klient.
Dragning mot satanismen
Mannen som syng om satans makter er frontfigur i det verdskjende black metal-bandet Gorgoroth. Black metal-miljøet er kjent for eit frynsete rykte og sin sterk dragning mot satanismen. «Greven», velting av gravstøtter og likskjendinga i Skien er døme på det.
Tiltalt for grov vald
No er Black metal-miljøet nok ein gong i søkjeljoset, denne gongen på grunn av ein 29 år gamal mann frå Sunnfjord. Mannen, som går under artistnamnet «Gaahl», må i dag møte i Sunnfjord tingrett, tiltala for særs grov vald mot ein mann i 40-åra frå Fjaler. Natt til 23. februar 2002 skal den tiltalte ha invitert 41-åringen med heim på nachspiel. På festen skal han ha slått og sparka 41-åringen ei rekkje gonger i hovudet og andletet. Mishandlinga skal ha pågått over fleire timar. Meir enn to år etter valdshendinga er offeret framleis sjukmeld.
Fleire dommar
Men det er ikkje første gongen sunnfjordingen må møte i retten. Han har fleire alvorlege dommar bak seg både for vald og rus. I eitt tilfelle skal han ha mishandla ein mann frå Høyanger i fleire timar. Blant anna med gaffel, slik at den andre fekk enorme angstproblem.
Laga oppstyr i Polen
Sunnfjordingen er heller ikkje den einaste i bandet Gorgoroth som er i klammeri med politiet. Gitaristen i bandet er tiltalt for grov valdtekt i Bergen. I vinter skapte bandet enormt oppstyr i Polen. Under ein konsert hadde dei med seg 130 blodige saueskallar og to kvinner og menn som var tilsynelatande korsfesta, på scena.