– Førarkortet er veldig viktig for å få seg jobb og bli integrert. Men språket gjer teoriprøven vanskeleg for mange. Det var det òg for meg, seier Asaad Hussein.
I eit klasserom på Flatbygdi skule i Vik står Hussein framme ved tavla og peikar på eit fareskiltet for farleg sving. To kveldar i veka står bankfunksjonæren frå Sudan slik og underviser dei andre flyktningane i kommunen i krevjande køyreteori.
Hussein som sjølv kom som flyktning til Noreg i 2015, gir hjelpa gratis.
– Når eg hjelper andre, blir eg glad. Kanskje dei kan hjelpa meg ein gong eg treng hjelp, seier han.
Mange stryk
Å ta bilsertifikatet er krevjande for nokon og ein kvar. I fjor strauk 42 prosent av dei som prøvde seg på teoriprøven for førarkort klasse B. 28 prosent klarte ikkje den praktiske prøven.
Vegdirektoratet kan ikkje seia om strykprosenten er høgare blant flyktningar. Men erfaringa til Hussein er at teoriprøven er spesielt krevjande for denne gruppa. I den eine undervisingsgruppa hans hadde alle stroke, og for éin av dei var det for tredje gong.
– Det er vanskeleg, og dei treng meir hjelp. Difor starta eg opp dette kurset.
Lærekøyring på dugnad
– Viss eg kan bruka nokre timar på dette i veka, kan det bety noko for flyktningane, familiane deira og samfunnet, seier Mustapha Mekhatria.
Mekhatria står utan for Flatbygdi skule med ein raud bil, som han har fått låna av kommunen. IT-arbeidaren frå Algerie kom til Vik for to år sidan for å arbeida i dataverksemda Highsoft. Deler av fritida si brukar han på å lærekøyra med flyktningar på smale fjordvegar.
Dugnadsjobben sparar flyktningane for mykje pengar og hjelper dei til å bli ein del av bygda.
– Dette er ein viktig del av integreringa, seier Mekhatria, som har skipa den frivillge organisasjonen «LevSaman», som tilbyr flyktningar og andre gratis opplæring for å bli ein del av det norske samfunnet.
Draumen om førarkortet
– Skal me køyra til Vangsnes, spør Mekhatria.
Fatemeh Tajik nikkar. Åleinemora har sett seg bak rattet og svingar ut på riksveg 13. Mekhatria rettleiar Tajik medan ho køyrer dei ti smale kilometerane nordover langs Sognefjorden.
Draumen for 30-åringen frå Iran er å klara teoriprøven. Får Tajik førarkortet, vil livet endra seg for henne og dei fire døtrene.
– Eg glad for å få lærekøyra med Musafah. Utan førarkort er det vanskeleg for meg i ei lita bygd som Vik. Med få bussavgangar, spesielt i helgane, er det vanskeleg å reisa på handel og å besøkja dottera mi som går på skule i Sogndal, seier Tajik.
- Sjå reportasje på Norge Rundt på NRK1 fredag 28. april om innvandarane i Vik som hjelper kvarandre med å ta førarkortet .