Sidan juni i fjor har arbeidsløysa i Sogn og Fjordane gått ned med 13 prosent, skriv NAV i ei pressemelding. Det skil seg frå talet på landsbasis, der talet på ledige har gått opp med fem prosent.
– Mykje av nedgangen i arbeidsløysa skuldast at vi har fleire i tiltak enn på same tid i fjor og at det er færre permitterte, seier direktør for NAV Sogn og Fjordane, Tore Thorsnes i pressemeldinga.
I juni var det 910 personar i Sogn og Fjordane heilt utan arbeid. Dette er 134 færre enn i same månad i fjor. Med 1,6 prosent av arbeidsstyrken heilt utan arbeid, har Sogn og Fjordane lågast arbeidsløyse i landet.
14 kommunar i Sogn og Fjordane har reduksjon i arbeidsløysa i juni. Størst reduksjon finn vi i Vågsøy og Stryn. Den høgaste arbeidsløysa finn vi i kystkommunane Selje og Flora.
– Det overordna biletet er likevel at det går svært bra for næringslivet i fylket. Det ser vi mellom anna på at dei fleste næringar har ein reduksjon i arbeidsløysa. Det er særleg positivt at utviklinga innan viktige næringar som industri og bygg og anlegg er god, seier Thorsnes.