I Stryn inviterte veglobbyistar og politikarane Følling til møte om E39 denne veka.
Hotelldirektør Richard Grov ved hotell Alexandra meiner Følling, som er sterk tilhengar av bru Lote-Anda, no heller må jobbe hardt for bru i Stryn.
– Vi føler at vi treng tydelege politiske signal, der det ikkje vert skapt noko som helst uvisse om kvar veg og vegtrasear skal gå. Slike tydelege signal vil hjelpe oss å kome i gang med planar som skal resultere i ny veg, seier Grov.
- LES OGSÅ: Ikkje semje om vegar i Nordfjord
Har kjempa for midtre og bru Anda-Lote
HOTELLDIREKTØR: Richard Grov.
Forkjemparane for E39 gjennom Stryn er utolmodige.
Tysdag var leiaren i Stamvegutvalet Jenny Følling på vitjing til Stryn, som er nyinnmeldt i utvalet som består av kommunane langs E39.
Men Følling har som fylkesvaraordførar og senterpartipolitikar kjempa for at E39 skulle gå i midtre trasé. Den kampen tapte ho, då regjeringa valde indre denne sommaren.
No forventar både hotelldirektør Grov, og leiar for Gode Vegar AS, Svein Sunde, at leiaren i stamvegutvalet stiler opp for indre.
– No ønsker vi å kome i gang med planane for strekninga Hornindal-Byrkjelo. Vi er så utolmodige etter å kome i gang at dersom ikkje statlege styresmakter tek tak i det, så tek vi tak i det, seier Sunde.
– Stortinget sitt mandat gjeld
Jenny Følling skal no leie eit stamvegutval med fire Nordfjordkommunar og to ulike trasear, den noverande, og den som skal vere E39 i framtida.
No er ho oppteken av å gjere alle til lags.
– I vårt mandat er det Stortinget sitt vedtak som gjeld, så det er det som gjeld. Så har E39 gått i midtre, vi har kjempa for 20-minuttsavgangar. Dei flaskehalsane som ligg mellom Sandane og Byrkjelo må rustast opp.
Men ho lovar å la gamle kampar vere nettopp det.
– Vi skal ikkje jobbe for å skape konfliktar. Vi skal jobbe for å samordne dei interessene som finst. Og ei gladmelding nyleg var faktisk 20-minuttsavgangar mellom Anda og Lote, seier Følling.
