- Mun liikon iežan ođđa nammii: Barack Black Eagle. Die lea hirbmat buorre namma, lohká Barack Obama neahttasiidui.
Dán mánu 19. beaivve galledii Demokráhtalaš bellodaga presideantaevttohas Senáhtor Barack Obama Crow Nation ja 4000 olbmo ledje čoagganan gullat mii sus livččii váimmu alde. Obama vásihii albma "Obamamania", go eamiálbmotčeardda seammá bures adopterii su iežaset álbmogii.
Obama almmolaš ámerihkálaš indiannamma, man Crow Nation sutnje attii, mearkkaša "Son gii veahkeha olbmuid miehtá riikka".
Buoridan dearvvasvuohtadili
- Dát ii leat dahkkon dušše showa dihtii, čilgii Robert Old Horn go julggaštii álbmoga ođđa gudnelahttu.
- Dát lea dahkkon dannego mii beroštat sus - ja son lea adopterejuvvon bearašlahttun, ja sus leat sihke vieljat ja oappát", lasihii Robert Old Horn.
Crow álbmoga sátnejođiheaddji, Carl Venne, sávai Obamai buresboahtima. Son seammás giittii Illinois oassestáhta senáhtora go lea leamaš mielde ordnemin oasseruhtadeami dearvvasvuohtaprográmmii mii lea gohčoduvvon "Indian Health Care Improvement Act". Venne geigii skeaŋkkaid senáhtorii maid son sáhttá juogadit bearrašiinis.
- Dáinna mii bivddášeimmet du, Senáhtor, ahte fuolašivččet ahte USA vuolláičálášii Ovttastuvvon Nášuvnnaid Eamiálbmot julggaštusa", lei Carl Venne cealkámuš presieantaevttohassii. USA lea okta riikkain mat leat jienastan julggaštusa vuostá.
Attii ođđa doaivaga
Obama sárdni Crow álbmogii attii buoret boahtteáiggedoaivaga moanaid indianii.
- Eai gallis leat nu guhká badjelgehččojuvvon Washingtona beales go Ámerihká eamiálbmogat", logai Obama.
- Menddo dávjá lea Washington fillen eamiálbmogiid, seammásgo leat geahččalan ovttalágán čovdosiid čađahit miehtá riikka. Dát rievdá go mun šattan USA presideanttan, lohpidii Barack Obama sártnistis.
Earret eará lohpida presideantaevttohas doallat jahkásaš deaivvadeami Vilgesviesus eamiálbmotjođiheaddjiiguin. Obama hálai maid das man heittogit USA lea gieđahallan iežas eamiálbmogiid historjjálaččat, ja ahte ráđđehus guhkin eret álo lea leamaš rehálaš singuin.
