Guoddala Fovse-akšunisttaid áššehuhttima
Ođđajagimánus áššehuvve Fovse-akšunisttat Borgarting lágamannerievttis.
Akšunisttat gárte diggái maŋŋágo válde Energiijadepartemeantta háldoseaset guovvamánus 2023:s.
Dál guoddala Stáhtaadvokáhta Fovse-akšunisttaid áššehuhttima.
– Hui láittas ja bahčá oažžut diekkár dieđu beaivvi ovdal sámeálbmotbeaivvi, lohká Fovse-ákšuvnna njunuš Elle Márgget Nystad.
Son lei gal lei juo smiehttan ahte nie dat dáidá geavvat, go sii vuhttet ahte Stáhtaadvokáhtta sávašii ahte sii geat leat áššáskuhtton áššis, galggašedje oažžut sáhkuid, dovddaha Nystad.
Alimusrievtti duohken dat lea mearridit dohkkehit go ášši ođđa meannudeapmái. Dáidet gollat mánut ovdalgo sii dies mearridit.
Nystad sávvá ahte Alimusriekti hilgu guoddaleami, muhto jos gártet fas diggái, de son sávvá ahte doppe ge vuitet.
– Mis lea maid vejolašvuohta Alimusriektái čilget maid mii oaivvildat guoddaleami birra. Min mielas ii leat dárbu ášši šat duođi eanet dikkis guorahallat, go ášši lea vuđolaččat juo čilgejuvvon dikkis, lohká Nystad.
Stáhtaadvokáhtta Stian Hermansen deattuha ahte sii guoddalit go oaivvildit ahte gaskariekti lea boasttu lágaid geavahan vuođđun dán áššis.
– Dát duopmu soaitá boahtteáiggis geavahuvvot eará áššiin gos lea sáhka miellačájehemiin ja akšuvnnain, ja earret eará sáhttá šaddat mearkkašupmi dás eará áššiin gos politiijaid bargovugiin šaddá sáhka, lohká Hermansen NRK:ii.
Maiddái politihkkárat gozihit ášši.
– Stáhta lea guktii juo vuoittáhallan dikkis dán áššis. Dál livčče sis áigi vuollánit ja diktit dán ášši orrut, dovddaha Ruksesbellodaga (Rødt) nubbijođiheaddji Sofie Marhaug NTB:i.
Oktiibuot 13 Fovse-aktivistta ledje áššáskuhtton áššis, ja ledje áššehuhtton Borgarting lágamánnerievttis. Dál fertejit sii vuorddašit ja gullat maid Alimusriekti lohká Stáhtaadvokáhta guoddaleapmái.
