NRK Meny
Normal

Stuorámus eaiggát geassáda

Guoládaga Sámi Radio stuorámus oamasteaddji, Sámeráđđi, lea mearridan geassádit.

Jevgenij Kirillov ja Aleksandr Paul filbmemin Anna Afanasieva Guoládaga Sámi Radio olggobealde.
Foto: Torkel Rasmussen

Go prošeaktaáigodat nohkká dán jagi, de ii áiggo Sámeráđđi šat joatkit oamasteaddjin Guoládaga Sámi Radios (GSR).

– Oamasteddjiid čoahkkimis 2008is mearrideimmet ahte galggašii Guoládaga Sámi Radio eaiggátvuođa galggašii rievdadit, muitala Sámeráđi Inger Anne Ärelä, SR Sámi Radioi.

GULDAL: SÁMERÁÐÐI GEASSÁDA

Sámeráđđi oaivvilda ahte GSR ferte ieš birget go lea sierra fitnodat.

– Radiodoaimmas galggašedje sisaboađut nu olu ahte basttášii dainna gokčat goluid. Mii leat dál čielggadeamen makkár golut sis leat ja makkár boađut dasto galggašedje vai birgejit ieža, dadjá Ärelä.

Heajos ruhtadilli

GSR álggahedje eará davviriikkaid Sámi Radiot, muhto eai šat eaiggáduša Ruošša beal Sámi Radio.

Maŋimuš áiggiid lea beaggán ahte Guoládaga Sámi Radio sáhttá heaittihuvvot heajos ruhtadili geažil. Sámeráđđi oaivvilda ahte GSR ferte organiserejuvvon eará láhkai vai beasašii eret heahtečovdosiin.

– Ovdal maid leamaš váttisvuođat. GSR lea álo šaddan ohcat prošeavttaid, ja ođđa prošeavttaid daid maŋŋel vai nagodit doaibmat. Radiodoaimmahat galggašii ieš bastit dinet vai birge, lohká Ärelä

Guoládaga Sámi Radio jođiheaddji Alexander Paul ii dáhto kommenteret ášši, muhto son doaivu GSRa ain birget boahtte áiggis.