Rogaland Teater skal bygga ny scenerigg på hovudscenen neste år, og då må alternative scener bli tatt i bruk.
Så når musikalen Shockheaded Peter, med stor suksess i Oslo, blir sett opp i Stavanger går det heile føre seg i Zetlitz-salen i konserthuset.
Det er kanskje ikkje dumt når teateret set opp ein musikal med ein seks meter høg elefant som ein av figurane.
– Det er visuelt stort og tilpassa for Stavanger konserthus. Ein så stor scene har ikkje Rogaland Teater, humrar teatersjef Arne Nøst.
Han seier Shockheaded Peter er eit barneteater for vaksne.
– Du bør vera 13–14 år får å ha glede av å sjå barn bli klypt i hel og brent opp. Det er grotesk på ein underhaldande og teikneserieaktig måte, seier teatersjefen.
- Les teatermeldinga frå Det Norske Teatret:
Skal fylla store sko
Espen Beranek Holm som songaren, Vidar Magnussen som seremonimeisteren, Marie Blokhus som Filip, Marianne Krogh som mor til Filip under oppsetjinga på Det Norske Teatret.
Foto: Fredrik ArffKomikar Vidar Magnussen, som er sentral i komiseriane «Side om side» og «Underholdningsavdelingen», kledde ei av hovudrollene då stykket blei spelt i Oslo.
Han har fått både Komiprisen og Heddaprisen for sine prestasjonar i rolla som seremonimeister.
I Stavanger er det Christian Eriksen som skal kle denne rolla. Han innrømmer at han har store sko å fylla.
– Då tenker eg at eg har ingenting å tapa. Magnussen har vunne alt, så eg har alt tapt. Eg kan berre gå inn og gjera mi greia. Eg har ikkje håp om prisar i det heile, seier Eriksen.
Han meiner stykket både er underhaldande og artig.
– Eg gler meg til å komma i gang og få leika meg i dette universet.
Premiere i august
Stykket har premiere i konserthuset 28. august og har framsyningar fram til 23. september. Totalt skal det blir spelt omlag 20 førestillingar i Stavanger.
Arne Nøst har ansvar for scenografi. Espen Hana skal også ha ei stor rolle og Erik Ulfsby har regien.
