For over tre år sidan kunne NRK fortelja om ekskrement, toalettpapir og bind som fløyt fritt i gjestehamna i Sandnes.
Sidan den gong har kommunen klart å redusera problemet, men framleis er både lukta og innhaldet av kloakk i sjøen for høg.
Dette har gjort at kommunen nå sett inn ein offensiv, for å finna ut kven sine toalett det er som lekk ut i sjøen.
- Les òg:
- Les òg:
Følg fargestoffet
Det er med hjelp av flytande fargestoff og dør-til-dør-metoden, dei håper å finna syndar-toaletta.
Kloakkjegerane frå kommunen heller fargestoff i toaletta i private heimar og butikkar, trekk ned og sjekkar kummane på utsida.
– Dersom fargen kjem i spillvasskummen er det riktig, dersom den kjem i overvasskummen ville det gitt ei forureining i Vågen, seier driftsleiar i vatn og avløp, Roar Karlsen, like etter dei har sjekka ein frisørsalong i Sandnes.
Der dei finn feil kan dei retta opp i feilkoplingar i kloakksystemet, og så langt har dei funne 26 av desse.
Til saman skal om lag tusen toalett sjekkast.
– Perla i regionen
Dei fleste syndene kommunen finn på kloakknettet er gamle.
– Anten er det feil som har blitt gjort utan vilje, eller er det rett og slett at det var praksis å la skiten renna til sjøs på 60- og 70-talet, seier bymiljøsjefen i Sandnes, Kjersti Ohr.
– Dette er sjølvsagt ikkje akseptabelt, slår ho fast.
Ordførar i Sandnes, Stanley Wirak, håper nå at dei endeleg kan klara å få bukt med kloakkproblemet.
– Me kan ikkje ha det slik. Dette er sjølve perla i regionen, så her må me ha det reint og fint, seier han.
– Det kjem til å kosta ein del, men me må berre få det reint, seier han vidare.
Det vil derfor bli aktuelt å høgna kloakkavgiftene, for å dekka noko av ekstrautgiftene med å tetta lekkasjane.
Ei utgift som kan koma på om lag 100 millionar kroner.
– Eg trur likevel at heile byen er interesserte i at me skal gjera byen rein nå, avsluttar Wirak.