Randaberg tok kongepokalen

Randaberg viste seg å vera det beste laget gjennom dei omlag 90 minuttane som finalen varte. I alle tre setta tok dei leiinga tidleg og heldt unna fram til slutten. Dette var ein kamp der spelarane følgde opp planen som blei lagt før start.

– Etter kvart blei det faktisk ein komfortabel siger, seier trenar til Randaberg, Jon Eirik Liseth.

Han var veldig glad for innsatsen til jentene i dag:

– Det er derfor me trenar så mykje og brukar så mykje tid på det. Selvfølgeleg har me mange gode spelarar, men ting kjem ikkje gratis, me må trena på det, seier Liseth.

• LES OGSÅ: Historisk seier for Randaberg volleyball

Best på banen

Det var mange som nemnde namnet Hanne Haugen Aas, då kampen var slutt og den beste spelaren på banen skulle kårast. Med unntak av eit par missar, sto ho fram som den beste poengplukkaren for Randaberg gjennom kampen. Ho var den spelaren som Oslo Volley frykta mest i finalen.

Skal feire i kveld

I kveld er det først bankett og etterpå skal spelarane ut på byen. Marita Bjørnøy Dale på Randaberg følte seg sikker på siger då det tredje settet starta. Og nå ser ho fram til resten av sesongen.

– Me går for "the double" i år, med siger i serien også. Ingen tvil om det, seier Dahle i sigersrusen.

Ho opplevde også god støtte frå tribunen. Heile tre bussar med fans frå Randaberg hadde reist den lange vegen til Oslo.

Til neste år er Randabergkvinnene kvalifiserte til europacup-spel, dersom klubben har økonomi til å delta.

Eit nytt lag

Randaberg har hatt eit herrelag i toppserien i svært mange år.

Kvinnelaget derimot er berre eitt år gammalt. I fjor tok dei over spelarane frå universitetslaget i Stavanger, etter at den satsinga blei lagt ned. I første forsøk klarte dei altså å vinne NM-finalen.

• LES OGSÅ: UiS-kvinnene tok hjem historisk pokal i volleyball

Idrettspresidenten på plass

Idrettspresident Tom Tvedt kjenner godt til volleyballsatsinga i Randaberg. Han var ordførar i kommunen i to periodar. I løpet av NM-finalen kom han med fleire tvitringar om kampen og avslutta med å gratulerer Randaberg med sigeren.