NAV snur - nå får Bjørn Eikeland pappapermisjon

Fleire fedrar har mista retten til ti vekers løna pappapermisjon fordi dei har søkt for seint. Ein av desse var Bjørn Eikeland frå Haugesund som har to døtrer, den yngste er eitt år gamal.

Fekk ikkje brev om tidsfrist

– Det kom veldig overraskande på meg. Eg blei litt sjokkert og gjekk litt ned i kjellaren, seier småbarnsfaren til NRK om då han fekk brev om avslag.

Årsaka til at Eikeland ikkje fekk søkt i tide var at NAV sende all informasjon om dette til mora til barnet.

• Les òg: Pappapermen auka til 12 veker
• Les òg: Vil gi mor skattelette mens far er hjemme
• Les òg: - Pappaperm gir bedre skoleresultat
  

Dermed tok han ulønt fri på jobben, men nekta å akseptera avslaget. Han klaga saka inn og nå har han fått gladmeldinga om at NAV gjer heilomvending, og vil endra praksisen sin.

– Eg har gått å venta på dette brevet lenge nå, eg er både letta og glad, seier Eikeland som feira det heile med marsipankake med påskrifta «Fedrekvote».

(Saka held fram under videoen)

Opnar for nye saksbehandlingar

Dette er også ei gladmelding for andre fedrar som er i same situasjon. For nå opnar NAV for å behandla fedrekvotesakene der far ikkje har fått eige brev.

– Fedrekvoten kan i utgangspunktet bli tatt ut i barnets tre første leveår, dersom denne perioden ikkje er omme vil me kunna gjera ei ny vurdering i saker der me har gitt avslag, seier Ellen Christiansen som er avdelingsdirektør ved Arbeid- og velferdsdirektoratet.

NAV veit ikkje kor mange dette dreiar seg om, men reknar med at om lag 200 fedrar nå vil få sakene sine vurdert på nytt.

Sjølv om fedrar frå første november i fjor har fått eige brev er det mange som gløymer søknadsfristen og dermed mister heile eller delar av fedrekvoten.

• Les òg: Flere tar ut pappaperm
• Les òg: Høyre vil gi alle fedre pappaperm
• Les òg: Tok pappaperm- vart forbigått

(Saka held fram under bilete)

Vil ta det opp med Lysebakken

Arve Kambe som er stortingsrepresentant frå Høgre meiner at dette ikkje er haldbart og vil ta saka opp for Barne-, likestillings- og inkluderingsminister Audun Lysbakken.

– Det blir heilt feil å ta vekk ein rett fedrar har berre fordi dei gløymer ein frist, når dette trass alt handlar om ein periode på tre år. Eg trur endå til at Lysbakken vil forstå at dette er urimeleg.

• Les òg: Mor holder seg hjemme når pappa har permisjon

Han legg vekt på at dette først og fremst handlar om familien og at NAV ikkje skal ta frå fedrar retten til pappapermisjon.