Ikkje plass på hurtigbåten

Stadig fleire passasjerar blir ståande igjen på kaiane i Ryfylke fordi det ikkje er plass på hurtigbåtane.

Hurtigbåten Fjordkatt som trafikkerer ryfylkerutene

Hurtigbåten 'Fjorkatt' trafikkerer i Ryfylke. Finnøy-ordførar Gro Skartveit vil ha fleire båtanløp på travle søndagar.

Foto: Magnus Stokka / NRK

Mens dette tidlegare stort sett var eit problem rundt høgtider og i langhelger, skjer det nå helg etter helg.

– Kvar søndag i november har det stått igjen folk på kaiane på fleire øyar, fortel ordførar i Finnøy, Gro Skartveit (V).

Måtte snu på kaien

Gro Skartveit

Ordførar i Finnøy, Gro Skartveit (V).

Foto: Venstre

Då ordføraren skulle til Stavanger forrige søndag måtte ho sjølv bestilla båtplass for å vera på den sikre sida.

– Me var fleire i reisefølgje, og det var folk som skulle på viktige ting i byen om kvelden som ikkje hadde ofra tanken på at dei måtte bestilla båtplass midt i mørkaste november. Desse fekk ikkje plass og måtte berre gå heim igjen.

Vil ha fleire båtanløp på travle dagar

Skartveit etterlyser nå betre informasjon om bestillingssystemet til Kolumbus.

Frå 1. mai i år var det ikkje lenger mogleg på bestilla plass på hurtigbåtane frå Stavanger på grunn av misbruk av ordninga.

Det betyr at det i dag berre er mogleg å bestilla båtplass frå Ryfylke.

Samtidig ber Skartveit fylkeskommunen sjekka om det er mogleg at fleire båtar i Ryfylkebassenget kan anløpa kaiane i kommunen på spesielt travle søndagar.