Det var ekteparet Jarle Hegerland (46) og Ann-Cathrin Losvik (48) som sat i helikopteret som styrta i Røldalsfjellet i Hordaland 18. februar.
I etterkant har politiet og Statens havarikommisjon (SHT) etterforska ulukka. Dei seier det enno er for tidleg å konkludere med ei årsak, men at vêret gav dårlege forhold:
– Det var veldig dårleg sikt i området då ulukka skjedde, seier avdelingsdirektør i SHT, Kåre Halvorsen.
SHT har henta inn bilete frå webkamera i området, og skal no undersøke vraket detaljert for å finne ut kva som har skjedd.
Her ligg delar av helikoptervraket i fjellsida i Røldal.
Foto: Gisle Jørgensen / NRKBraut av flyturen
Ein pilot frå Fonnafly skulle eigentleg fly i fjellområdet i Røldal rundt same tidspunkt som ulukka skjedde.
– Då han møtte det dårlege vêret, tok han ein runde i alpinanlegget og vurderte at forholda var for dårlege, seier flygesjef Stian Solberg i Fonnafly.
– Det var ein kombinasjon av nedbør og skyer som gjorde at han bestemte seg for å snu og fly tilbake, seier han.
Flygesjefen seier han uttaler seg på generelt grunnlag, og at piloten var i området noko tidlegare enn ekteparet som omkom i helikopterstyrten.
Piloten har vore inne til intervju hos politiet som vitne i saka.
Helikopteret er stygt skada etter ulukka.
Foto: Tale Hauso / NRKHåpar på GPS-spor
Vêret har vore viktig i etterforskinga så langt, både for politiet og SHT. Hardanger lensmannsdistrikt har henta inn vêrdata, samt videoar frå folk som har filma helikopteret.
– Me har snakka med mellom fem og ti personar som har vore i området. Ingen har sett styrten, men har informasjon som kan fortelje om saka, seier Paul Henriksen, etterforskingsleiar ved Hardanger lensmannsdistrikt.
Jarle Hegerland, som omkom i ulukka, hadde hatt sertifikat til helikopter sidan august 2018. Helikopteret kjøpte han i november.
– Politiet har fått ein heil del bilete og videoar frå Røldal, både frå webkamera og private. Når du lettar med helikopter i eit tettbygd område, vekker det interesse, seier etterforskingsleiaren.
Hardanger lensmannsdistrikt har gjennomført krimtekniske undersøkingar av ulukkesstaden, og ser no på objekt derifrå.
Dei håpar mellom anna å kunne finne GPS-spor frå mobiltelefonane om kor helikopteret har flydd.
