Trollpikken blir til "folkepikk"

Kjetil Bentsen har stått i spissen for å gjera Trollpikken i Egersund til ein av Dalane-regionen sine største turistattraksjonar. Søndag kveld er det ein glad, men sliten mann, NRK snakkar med.

• Les også: Håper denne kan stå opp mot Kjerag og Trolltunga

– Det er heilt vilt. Helga byrja jo depressivt, men det er snudd til eit enormt engasjement. Og klarer me å få den opp igjen, så er det heilt fantastisk, seier Bentsen.

Lokal entreprenør stiller opp

Nå ser det faktisk ut som steinformasjonen skal koma tilbake i same struttande posisjon som før helga. Sverre Garpestad, eigar i entreprenørselskapet Bertelsen og Garpestad, har lova å stilla opp.

– Han har sagt at det me ikkje klarer å samla inn av pengar, det stiller han opp med sjølv, opplyser Bentsen.

• Les også: Turgåer om hærverket på Trollpikken: – Som å få revet ut en del av sjela

Truleg er steinen på mellom åtte og ti tonn, så det må byggjast ei kran ute i terrenget der steinformasjonen står.

– Sverre Garpestad meiner at to til fire mann, som jobbar i ei veke, skal klare å få steinen på plass igjen, seier Bentsen.

Pikken skal herdast

Reparasjonen skal gjerast ved først å bore hol både i steinen og inn i fjellet, der den tidlegare sto.

Deretter set ein jernstenger og ein form for mørtel inn i borehola og heiser steinen på plass.

– Eg er lova at resultatet skal bli ein herda Trollpikk – både armert og herda, fortel Bentsen.

Får mange tips

Politiet i Egersund har lova å starta etterforsking på måndag, for å finna ut kven som kutta av Trollpikken natt til laurdag.

• Les også: – Finnmarkingene har den største «pikken»

Bentsen har fått så mange tips om mogelege gjerningsmenn, at han har god tru på at politiet kjem til å finne ut av saka.

– Eg har fått ein god del telefonar frå folk som meiner dei har viktige opplysningar, og denne informasjonen har eg sendt vidare til politiet, seier han.

– Trur du saka blir oppklart?

– Eg trur absolutt at politiet kan klare å finne ut av det, seier Bentsen.